نجوى المالحي-كود//
هاد المؤثرين لقاو طريقة جديدة باش يجمعو اللايكات ويجيبو التفاعل ديال الناس. هاد الطريقة لي مبنية على الكذوب ومعندها لا ساس لا راس هي يقولو انهم تزوجو.
سليم الحمومي لي معروف بسوالم قال أنه تزوج بصوفيا شرف. بجوج بيهم طامعين في اللايكات وزادو كملوها مشاو سافرو زعما بحالا كيدوزو شهر العسل.
مصدر “كود” أكد أنه ماكين لا زواج لا هم يحزنون والقضية كاملة غير طلعة بيناتهم باش يدخلو الفلوس من مشاهدات اليوتوب ويطلعو les impressions ديال انستكرام حيت الاشهارات على الابواب.
ومن بعد الحمومي جا شروقات لي حتى هو طلعها على المتتبعين بعدما بان مع لبنى لي معروفة ب”لوبينيت” ودار راسو بحالا غادي يخطب وهادشي كامل غير الكذوب.
العالم كامل ولات فبه التفاهة في les vlogs ولكن على الاقل فبلدان اخرى كتلقى بعض الفيديوهات فيهم فائدة وعندهم قيمة، الا المغرب كتلقاهم كاملين غير مطلعينها بالبوسان بحال شروقات، والضحك الباسل بحال الحمومي وفي اسوء الحالات كتلقى “شوفو الطابلة لي صوبت لحماتي” و”شوفو كيفاش كنغسل رجلين راجلي”.
