عفراء علوي محمدي- كود//

ماشي بزاف دالجهات سجلات إصابات بفيروس كورونا فالصباح، وهذشي اللي كيفسر تسجيل 73 إصابة فقط اليوم.

جهة مراكش آسفي جات فمقدمة الترتيب ب49 إصابة جديدة، وبلغ المجموع دالإصابات فيها 2811 حالة، بعدها جهة فاس مكناساللي سجلات اليوم 12 حالة، ووصلات فالمجموع ل1797،  ثم كاتجي موراها جهة الرباط سلا القنيطرة والجهة الشرقية ب5 حالات لكل وحدة فيهم، باش يوصلو فالمجموع ل2061 و274 على التوالي.

الجهات لخرين ماسجلوش بزاف دالإصابات، بحيث طنجة تطوان سجلات 4 (3096)، وجهة العيون الساقية الحمرا سجلات حالة واحدة (821).

بالنسبة لباقي الجهات، واللي هي كازا سطات ودرعة تافيلالت وبني ملال خنيفرة وسوس ماسة وكَلميم وادنون والداخلة واد الذهب، فماسجلات حتى إصابة، وبقى مجموع الحالات مستقر فيها ف3935 و586 و169 و101 و145 و19 على التوالي.

و”كود” غاتوافيكم فالعشية بمعطيات مفصلة على الوضعية الوبائية لفيروس كورونا فالجهات والأقاليم هذ النهار