كود مراكش ///
نادر بزاف فين كيدير مصطفى التراب رئيس المكتب المديري للمجمع الشريف للفوسفاط =او سي بي= خرجات اعلامية. ونادر فين كيدير لقاءات كتحضرها الصحافة كيتكلم فيها على شركة تعين على رأسها سنة 2006. التراب دار لقاء على هامش “الحوار الاطلسي” لقاء مساء السبت اللي فات فمراكش مع قادة المستقبل. قرابة 30 شاب طيارة فعقلهم وقرايتهم غاديين يمثلو المستقبل فبلدانهم٬ هادو جاو للمجمع وشافو من المنجم حتى الجامعة ومراكز التكوين و13/37 بخريبكة.. وكان لقاء فالاخير مع التراب.
فهاد اللقاء هدر على امور كثيرة كتهم الشركة العملاقة منها ما اثير حول المجمع بكينيا. ما سماش ولكن الفاهم يفهم باللي كيحيل على هاداك الشي ديال كينيا.
التراب قال باللي “الشركات المنافسة كعات حقاش او سي بي = دارت اسمدة كتلاءم تربة كل دولة افريقية. يعني قبل ما يدخلو للسوق الافريقية اللي كيمثل فيها الاراضي الصالحة للفلاحة 60 بالمائة من مجموع هاد النوعية من الاراضي فالعالم٬ دارو دراسات على تربة كل دولة باش ينتجو ليها اسمدة كتوالمها.
هاد الشي حسب التراب خلى الانتاج فهاد الدول كيرتافع. يعني الصابة زادت ما بين 5 المرات و2.5.
هاد الشي فيه اشارة بمشاكل كانت فكينيا. سلطات هاد لبلاد دارت مذكرة اعتقال ضد باطرون او سي بي فافريقيا على قبال اتاهموه باللي الاسمدة ديال الشركة فيها الدغل. المجمع الشريف للفوسفاط-فرع كينيا دار بيان رد فيه على هاد الشي وقال باللي كيرفض “بشكل قاطع الاتهامات الموجهة إليه لأنها لا تعكس، لا ممارساته التجارية ولا صرامة سياسة الجودة التي تعتمدها المجموعة”؛ مبرزا أن فرع المجموعة بكينيا، حرص على الاحترام الدقيق للمساطر ومعايير المطابقة التي تفرضها القوانين الجاري بها العمل بهذا البلد.