كود الرباط//

وكالات الأسفار حيحو على وزيرة السياحة بسبب اقصائهم من الاجراءات اللي دارت الحكومة للنهوض بقطاع السياحة، من قبيل الاعفاءات الضريبية والدعم ديال مليار درهم المخصصة للتكوين والصيانة.

وكالات الأسفار فيهم نوعان، واحد نوع مخصص فقط لجلب السياحة ويجيب الدوفيز ويحرك ناعورة الاقتصاد الوطني وكيدير غير مع السياحة، وانواع اخرى كلها شنو كيدير، مثلا كاين نوع ديال صحاب وكالات الحج والعمرة، هادو كيخدمو مع فئة وحدة لي كيديو فلوسهم للسعودية ويحجو ولا يديرو العمرة. هاد النوع حسب مصادر “كود” مامحتاجش للدعم بحيث مكيوفرش فرص شغل كثيرة إضافة إلى انه مكيجيبوش العملة الصعبة.

واش هادو كيستحقو الدعم، طبعا لا، صحاب الوكالات ديال الأسفار لي كيجيبو السياحة معجبهم هاد النوع يزاحمهم ويبغي تاهو دعم رغم أنه كيشتغل فقط بشكل موسمي ماشي على طول السنة.

وكالات الاسفار لي كيجيبو دوفيز ويجيبو السياح ويخدمو المغاربة معهم، واكلين الدق وخصهم دعم فحال الفنادق السياحة، ولكن تخلطو مع صحاب وكالات ديال الحج والعمرة، وميمكنش الوزارة تعطيهم امتيازات ضريبية حيث ماشي كولشي فحال فحال من الناحية الاضرار الاقتصادية الناتجة من ازمة كورونا.

واحد بولحية من صحاب وكالات الاسفار اللي متخصصة فالحج، دعا إلى الاضراب يوم الاربعاء 26 من الشهر الجاري قدام وزارة السياحة. وهضر باسم الجمعية الوطنية لوكالات الأسفار.

دبا هادو تخلطو مع صحاب السياحة، ماشي فصالح لا السياحة ولا هاد الوكالات.