كود هند لكلاوي كازا ///

كيفاش يمكن تواجه خصم سياسي؟ اراه لفايك نيوز. هادي قاعدة قديمة. هاد الشي دايرينو هاد ليام مع عزيز اخنوش وزير الفلاحة والصيد البحري والتنمية القروية. هجوم عليه بصفتو الحزبية٬ باعتبارو رئيس حزب “الاحرار”٬ فسنة انتخابية.

دابا واخا تم تكذيب معطيات قديمة في مناسبات سابقة، ومع ذلك اخنوش مستهدف بالفايك نيوز، هذه المرة عاودو نشرو أخبار زائفة سبق وتم تكذيبها، وترويجها على أساس أنها اخبار جديدة. .

المجموعة العائلية للي عند أخنوش اسهم فيها سبق ليها قدمات الأرقام الحقيقية لتعاملاتها التجارية وفيها باللي هادوك التقارير ماشي بصاح.

وكان سعيد البغدادي، المدير العام لشركة “إفريقيا” للمحروقات، كان نفى صحة الأخبار التي راجت بخصوص تضاعف ثروة عزيز أخنوش، رداً على المعطيات التي نشرتها مجلة “فوربس” والتي استخدمها تقرير أوكسفام.

وأكد المدير العام لشركة “إفريقيا” أنو من غير المنطقي تتضاعف أرباح الشركة فوقت الأزمة، ووضح أنو منذ بداية الأزمة الصحية المرتبطة بفيروس “كورونا” حتى نهاية شهر يونيو الماضي، سجلت شركات المجموعة انخفاضاً في أرباحها ما بين ناقص 86 بالمائة و92 بالمائة، اعتماداً على الشركات التابعة للمجموعة. اييه.

ماشي غير هاد الشي، المسؤول قال باللي الأنشطة الاقتصادية الأخرى للمجموعة تضررات مع هاد الوباء. مثلا مطاعم شركة “إفريقيا”، تسدات هادي اشهر. دابا عندها قيود فساعات العمل وعدد الزبائن حتى. منضابطين لقرارات الحكومة فهاد الجانب.

حتى أسهم شركتي “إفريقيا غاز” و”مغرب أوكسجين”، المدرجتين في بورصة الدار البيضاء، تتراجع منذ بداية السنة. وهاد الشي راه يمكن لاي مواطن يشوفو. راه كلشي متاح.

راه هاد الازمة ما زگلات حد. ضربات كلشي. المدير العام للشركة قال باللي فظل هاد الظروف “كنبذلو جهدنا كولو للتعامل مع هاد الوضع المعقد والحساس”.

اذن مول هاد الهجمة هو خصم سياسي منافس لاخنوش . هجمة جديدة تستعمل فيها لكذوب باش تهاجمو. باش تضرب كاع اللي دارو اخنوش فهاد السنوات٬ سواء فالحكومة او فحزبو. مغالطات ومغالطات ومغالطات. هنا ما كاين لا تنافس سياسي شريف لا احترام قواعد اللعب السياسي. هنا كاين توزيع المهام داخل هاد الطرف السياسي باش يوسخو صورتو. طبعا قيادتهم عارفين هاد الشي كذوب. حقاش كون كان شي حاجة ضد القانون او استغلال لهاد الحالة راهم غاديين يحركو مؤسسات معنية بهاد الشي. ما دارو والو حقاش متأكدين باللي كل ما يقال عن الثروة داخنوش هاد ليام كذوب وفايك وزفوط

دابا ايلى هو خصم سياسي ليكم وانتوما كتقولو باللي متحكمين فالميدان عبر جمعياتكم٬ علاش كتختالقو الكذوب. ايلى عند شي خصم ازمة داخلية يحلها داخليا ما يصدرهاش ويخلق احداث باش ينسي ناسو هاد الازمة.

راه فاللخر ما يصح الا اللي واقف على الصح. الا اللي صادق مع بنادم. الا اللي صادق مع وطنو. الا اللي كيبغي هاد المغرب. الا اللي ما يمكنش ليه يفكر ولو دقيقة ويدير تقابل بين الدفاع على الكركرات وبين دفاعو على شي مدينة بعيدة علينا ب7 سوايع طيران. حقاش غادي يختار الكركرات اولا واخيرا.