عفراء علوي محمدي- كود//

كشفات دراسة رسمية على فيروس “كورونا” داروها مسؤولين فمركز مكافحة الأمراض والوقاية منها فالشينوا، بللي نسبة الوفيات بهذ الفيروس ماتعداتش معدل 2,3 فالمية فالشينوا، حيت توفاو غير ألف و868 شخص، بينما 72 ألف 436 شخص منقولة ليه عدوى الفيروس، من ضمنهم 44 ألف و672 واحد مصاب بشكل مؤكد بيه.

وأكدات الدراسة، اللي كاتعتبر أكبر دراسة تدارت من بعد انتشار الفيروس لحد الساعة، بللي 80,9 فالمية من الإصابات بالفيروس بسيطة، وبللي كثر من 12 ألف شخص تشافى من المرض، فالوقت اللي تسجلات 13,8 فالمية من الإصابات الخطيرة، وفقط 4,7 فالمية من الإصابات الحرجة.

وبالنسبة للناس اللي ماتو بالفيروس فالشينوا، فالدراسة أكدات بللي 14,8 فالمية ديال الوفيات من المصابين فاتو 80 عام، و8 فالمية أعمارهم كتراوح بين 60 و70 عام، 1,3 فالمية بين 50 ل60 عام، و0,4 فالمية بين 40 ل50 عام، أما معدل الإصابات من 9 سنين ل39 عام فماتجاوزش 0.2 فالمية، فالوقت اللي انعادمات فيه الإصابات فصفوف الأطفال قل من 9 سنين.

وبالنسبة لنسبة المتوفين بالفيروس من عدد المصابين به عامة على مستوى النوع، فكانت عالية عند الرجال على النساء، حيت تسجلات 2,8 فالمية ديال حالات الوفيات فصفوف الرجال، و1,7 فالمية ديال الوفيات فصفوف العيالات، هذشي وأكدات الدراسة بللي أغلب المتوفين بالفيروس كانوا كيعانيو فحياتهم من أمراض القلب والشرايين والسكار وأمراض الصدر المزمنة وطلوع الطونسيون.

وبخصوص للمصابين بالفيروس من أفراد الطقم الطبية، فتحددات ف3019 انتقلات ليهم العدوى، 1716 منهم تاكدات إصابتهم، و5 منهم فقط ماتو.

الناس اللي دارو الدراسة أكدو بللي ذروة المرض بانت بين 23 و26 يناير من هذ السنة، وتراجع المرض فالظهور منذ 11 فبراير بسبب إخضاع مدن بأكملها للحجر وتوعية الناس بسبل الوقاية وغسل اليدين ولبس الماسكات، لكنهم فنفس الوثت حذرو من رجوع الفيروس من جديد منبعد ما يرجعو الناس من العطلة الصحية اللي خداو.