كود- عن ميدي 1 تيفي//

قال منصف السلاوي، الباحث فعلم المناعة والبيولوجيا الجزيئية والمستشار العلمي لعملية “وار سبيد” اللي دارت ميريكان من أجل تطوير لقاح فيروس كورونا المستجد، أنه منبهر بالحملة الشاملة ديال التلقيح اللي غيقودها المغرب، واعتبرها مزيانة.

وزاد السلاوي، فلقاء ليه مع قناة “ميدي 1 تيفي”، أنه ماعندوش دراية جيدة باللقاح اللي اعتمد المغرب “سينوفارم”، لكن عارف التقنية اللي خدام بيها عذ النوع من اللقاحات، اللي كيعتمد على زراعة فيروس ضعيف وقتله بطريقة لا تشوه مستضادات الفيروس، وهذشي من أجل تقوية المناعة وجعلها كتشتغل بشكل أكبر ومستمر.

وأضاف الباحث الأمريكي من اصول مغربية أنه كاينين لقاحات كثيرة كتخدم بنفس الطريقة وتبتات النجاعة ديالها، ومايمكنش التشكيك بهذ التقنية.

وشاف أن ووزارة الصحة غالبا غتكون تعمقات فالبيانات ديال فامسان “سينوفارم”، وتاخدات القرار الصائب وفق هذشي.

من جهة خرا، كيشوف السلاوي ان الناس الأولى باخد عينة من اللقاح هوما الاطباء والاطر الصحية اللي كتشتغل فالصفوف الأمامية لمواجهة هذ الجائحة، بالإضافة للناس اللي عندهم أمراض مزمنة والناس الكبار وضعاف المناعة.