الوالي الزاز -كود- العيون ////
[email protected]

هاد المكتب المديري الشريف للفوسفاط غير كيخربق وهاد التخربيق هو لي كيورطو فمشاكل بحال اللي وقعات فجنوب افريقيا. وكيخليه دائما عُرضة للهدرة الكثيرة والإنتقاد وكيخلي ناس الصحرا وخاصة جهة العيون الساقية الحمراء كيتموقفو منو.

المكتب ديال الفوسفاط قالك أسيدي داير زيارة سانك إيطوال لوفد إعلامي للعيون باش يطل على شركة فوسبوكراع ويشوف الخدمة كيدايرة تم وشي تخربيقة ديال المياه فيه. مزيانة هادي. غير لاش. باش يدافعو على المكتب. باش يقنعو لمغاربة. راهم مقتانعين. راه اللي جاي متافق مع المكتب ماشي ضدو.

جايب أسيدي ناس ما عندهوم علاقة بالصحرا. اي ماشي ولاد المنطقة. واللي عندو شوية المعرفة معروفة سمعتو. ملي غادي ديرو زيارة ديروها أسيادي للناس لي فالعيون والداخلة والسمارة وبوجدور وماشي بالضرورة يكونو إعلاميين. ديرو زيارات لفعاليات المجتمع المدني والناس لي غادي تنفعكم. ماشي الناس لي غادي تجي يومين وتخسرو عليها فلوس وتا إضافة ماغادي يقدموها. جيبو اللي عندو موقف من المكتب

هادشي باش غادي المكتب ديال الفوسفاط ماشي حتى لهيه. هاد المكتب خاصو يتواصل مع الساكنة المحلية ويصلح علاقتو معاها. ويخليها مرة واحدة تشوف مقر هاد الشركة ديال فوس بوكراع كيفاش دايرة لأنها ولات مؤسسة قريبة فنظامها الأمني ل”غوانتانامو” تا حد ما يقدر يقرب ليها.

ياك أسيدي حنا كساكنة محلية كنستافدو من الثروات الطبيعية. كيف كيظل يكرر على مسامعنا المكتب ديال الفوسفاط. كيفاش ما يمكنش لينا نشوفو هاد المقر ديال فوس بوكراع كيداير ؟

بحال هاد السياسة لي تا علاقة راه هي لي كتخلي جنوب إفريقيا تحجز شحنات متابع، وغالبية السفن لي كتدي الفوسفاط تغير مسارها فإفريقيا شحال من مرة باش تتجاوز مسألة الحجز بناءً على دعاوي قضائية ديال البوليساريو. حقاش غلطو فالهدف. غلطو فالفئة اللي خاصها تقتانع. بلا ولاد العيون وبوجدور السمارة والداخلة… ما يمكنش لهاد المكتب يخدم ويقنع ناس العالم ماشي لمغاربة بانو كيستثمر فالمنطقة مع اولاد المنطقة