كريم الشركي – كود //

يبدو أن المنتخب الجزائري فعلا مابغاش يلعب مع أسود الأطلس فدور ربع نهائي كأس العرب 2021، اللي منظماه حاليا قطر.

الإتحاد الجزائري لكرة القدم، راسل اللجنة المنظمة للمونديال العربي، باش يتحيد الپينالتي اللي صفرو لاربيطر الأرجينتيني “فاكوندو تيلو”، ديال الماتش اللي لعبوه أول البارح الثلاثاء (7 دجنبر 2021) مع مصر، وهو (الپينالتي) اللي جابو بيه المصريين التعادل فالدقيقة 60.

ورغم نفي الجزائريين تقديمهم لأي احتجاج أو اعتراض فهاد الإطار، إلا أن قناة “الكأس” القطرية أكدت أن “الاتحاد الجزائري لكرة القدم قرر تقديم احتجاج للجنة المنظمة لمونديال العرب”، وهو ماتم بالفعل.

الإعلام الجزائري حتى هو ماباغيش فرقتو تلعب مع وليدات عموتة بالنظر للمستوى الكبير اللي مقدمينو الأسود لحد الساعة فهاد النسخة من كأس العرب، بحيث ماتسجل عليهم تا هدف وربحو كل الماتشات بالعلامة الكاملة، وبحصيلة 9 نقاط و 9 أهداف. أقوى دفاع و أقوى هجوم فالدور اللول.

وفالوقت اللي المنتخب المغربي الرديف، كيوجد طرونكيل للماتش الجاي ديال الكار دوفينال، الجزائريين مزال كيتباكاو باش مايلعبوش هاد الماتش و ماكرهوش يدوزو للطريق الأخرى اللي غتلاقيهم مع منتخب الأردن.

المهم هاد الناس بغاو يلصقو كلشي فلاربيطر ويديرو بيه السبة، وهو أصلا المتتبعين عجبهوم المردود ديالو على العموم، وشافو بللي أنه ساهم بشكل كبير باش يدوز الماتش بلا توقفات كثيرة أو مشاكل، وخا كان فيه لونكَاجمون فيزيك زايد شويا.