كود اسماء غربي ///
تطبيق هاديك الهدرة قال وزير الخارجية والتعاون ناصر بوريطة قبل ايام فالبرلمان على عودة باقي لمغاربة اللي حصلو برا بدا. فهاديك الطريقة اللي شركات الطيران والعقل صعيب يصدقها: تجي من مرا على حسابك وسكن فاوطيل وشروط اخرى
وفق احد لمغاربة الحاصلين فاوربا ل”كود” فان سفارة هاد البلد اتصلات بيه البارح الثلاث باش تقول ليه راه غادية تبدا الرحلات بعد غدا الجمعة 10 يوليوز.
المواطن اكد ل”كود” باللي ايلى بغيتي ترجع لبلادك خاصك 3 شروط. اولها سيرتافيكا باللي درتي التيست ديال كورونا. فشي دول كيدير 65 اورو. الشرط الثاني وفق مصدر “كود” وهي تخلص البيي ديال الطيارة ديالك او وسيلة النقل اللي غادي تجي فيها. يعني ما كاينش الفابور والشرط الثالث الغريب هو تجيب حجز فاوطيل. انت داخل لدارك فالمغرب وخاصك تجيب ليهم ريزيرڤاصيون فاوطيل انت تختارو ويكون مدتها 9 ايام. طبعا انت تخلص لوطيل والماكلة وكلشي لمغاربة عايشين فالمغرب.
دابا هادي حكومة هادي وزارة. فين المعارضة فين القوى اللي كدير شوية التوازن للسلطة التنفيذية، واش هاد الشي قانوني واش ممكن شي حد يديهم للقضاء.
دولة تخلات على ناسها اكثر من 4 اشهر وتسلفو وسالاو ليهم لفلوس وباش بغاو يجيو دارو معاهم هاد الشروط.
المشكلة ان هادي تقدر دير مشاكل سياسية للمغرب. مثلا ايلى كنتي فاسبانيا او فرانسا ودرتي هاد الشروط راه هاد الدول غادية تطبق على مواطنيك ايلى تفتحو الحدود نفس الشروط. اي هاد الشروط الثلاث. لو ان هادو جايين من دول فيها كورونا فيروس بزاف بحال ميريكان او امريكا اللاتينية تقدر تكون مفهمومة قضية التسيت. كيفاش نجيب تسيت ما فياش كورونا فيروس ونجيب حجز 9 ايام فاوطيل.
هاد الحكومة ضاربها الله ومن شوهة لشوهة.