العراقي لي حرق القرآن فالسويد علق لبلاد خرا.. غادي يطلب فيها اللجوء بعدما قررات ستوكهولم تجري عليه
كود هناء ابو علي ///
عثمان بنجلون الرئيس المدير العام ل”بنك افريقيا” عندو منطق خاص ديالو. هاد الملياردير اللي ما عرف يديرهم بعد منحو الملك الراحل الحسن الثاني هاد البنك بلا ما يرجع لهاد البلاد شوية من الخير اللي دار٬ ناض كيهدر على الوطنية. على تمثيلو للمغرب باش هاجم مولاي حفيظ العلمي وزير التجارة والصناعة والتكنلوجيات الحديثة بسباب بيع شركة التأمينات “ساهام” للشركة الجنوب الافريقية “سانلام” حقاش هاد الدولة ضدنا فالصحرا.
عثمان بنجلون هو كان صرح فاول 2018 باللي غادي يفتح فروع بنكتو ف5 دول افريقية منها جنوب افريقيا وزمبابوي. نفس الدولة وزيد عليهم زمبابوي اللي عندها نفس التوجه الجنوب افريقي من ملف الصحراء. وفين الوطنية يا الفاهيم.
اكثر من ذلك ف15 نونبر 2007 طار للجزائر وتلاقى مع عبد العزيز بلخادم حينها كان وزير اول الجزائر. مشى بصفتو رئيس اتحاد الابناك المغاربيين ومشى بصفتو رئيس البنك المغربي للتجارة الخارجية. بنجلون طلب حينها باش يفتح فرع فالجزائر. وعدو بلخادم وطبعا قولبوه. يعني مشى عند الدولة اللي حامية البوليساريو وداعماها. وفين الوطنية يا اللي مخدم غير بني عمو فبنك عطاه ليه الحسن الثاني زمن التفويت.