محمد سقراط-كود///

بوليسي ربما رتاكب جريمة بالسلاح الوظيفي ديالو( القضاء لي غادي يحسم في الحادثة واش جريمة او لا)، لي باين فالفيديو هو أن البوليسي تيرا للبنت فراسها من بعد مردخها الفيدور مع الأرض، الفيديو ديال الحادثة لي صوروه السكان خرج من بعد الرواية ديال البوليسي وديك الجوقة لي كانت مجموعة تما والشهود لي شهدو فموقع إخباري قبل المحكمة، شهدو باحداث مكايناش فالفيديو، البوليسي ملي شاف الورقة طاحت هرب لتطوان وربما كان كيقلب يخرج لبرا، بوليسي تيرا فشي مجرم في إطار العمل راه ماغاديش يهرب، من بعد الفيديو لي خرج تجمعو كاع دوك لي كانو مجوقين تم وهبطو لبنيقة، وحتى هنا الأمور عادية.

لي ماشي عادي هو هاد الحادثة يتم إستغلالها من البكاية ديال الفايسبوك ويعتابروها إعدام فالشارع العام من طرف أحد رجال النظام لمواطنة صالحة آمنة مسالمة، وبحال الى حنا ديما عندنا هاد الحوادث والتجاوزات لدرجة الموت من قبل رجال الشرطة في حق المواطنين العزل، وبحال الى كازا ولات شيكاكو القرطاس ديما يلعلع فيها، حتى إلى حكم القضاء فالحادثة وعتابرها جريمة قتل، فهادي جريمة دارها مواطن مغربي يعمل كشرطي، بحال عرام ديال الجرائم لي كيرتاكبو المغاربة يوميا، ولحد الآن الأمر معزول وكيهم فرد فقط ومعندو علاقة بالشرطة كجهاز أو بالدولة ناضت كتعدم مواطينيها بلا محاكمة مع الربعة ديال الصباح.

نهار كيتحط فالأنترنيت شي فيديو ديال شي مشرمل هاز سيف والبوليس دايرين بيه وباغين يشدوه بالتي هي احسن بلا مايتيريو فيه، كتلقى كولشي كيهدر على هيبة المخزن وكيفاش عندنا البوليس غير مدربين على بحال هاد التدخلات، وخاص يبقاو يتيريو فالمشرملين باش ترجع هيبة المخزن، فنفس الوقت ملي كيتحط خبر ديال شي مشرمل مات في إشتباك مع الأمن، كيبدى بنادم يبكي ويحاضر فتخصصات الشرطة وبيداغوجية التدخل الامني، الموشكيل لي عندنا حاليا فالمغرب هو ان المجرم محمي بالقانون وبالمجتمع، ملي كيدير الجريمة اولا مكاينش عقوبات طويلة تانيا الحبس داير بحال لوطيل وماهو ديال عقوبة ماهو ديال إعادة التأهيل غير بلاصة فين كيربيو المشرميل صحتهم باش يخرجو يرونوها فالسيفيل، ها علاش خاص الردع ديال البصح من طرف الامن فالشارع ومن طرف القانون فالمحاكم ومن طرف مندوبية السجون فأنها ترجع الحبس بلاصة لي نهار يخرج منها المدان مايدورش يشوف من وراه.