المطارات المغربية استقبلات كثر من 6 مليون مسافر وها المطارات اللي حيحات فهاد الفترة
كود-الرباط//
العلاقات بين البوليساريو و نظام الاسد مزيانة بزاف،حيث بجوجهم تاريخيا كاينتاميو للتيار القومجي العروبيو ثانيا حيث الجزائر كتدعم الاسد ف الحرب الاهلية مؤخرا و الاخير اللي متحالف مع الروس و الايرانيين خدام مند مدة غير بالمرتزقة من جميع انحاء العالم بعدما نقصات اعداد الجيش ديالو بحال مرتزقة حزب الله ولا ميليشيات شيعية من العراق و لا قوات يمينية متطرفة من اوروبا..
ورغم ان الجامعة العربية جرات على هاد النظام و بزاف من الدول سحبات سفراءها بعد الجرائم اللي دار، الجزاير مزال متمسكة به،والعلاقات ولات مزيانة كاع ملي المغرب قطع العلاقة مع الاسد، و هاد الاسد اللي حاط قوات حزب الله ف دمشق و غيرها كايقلب كيفاش يجيب عندو قوات البوليساريو يخدمو كمرتزقة..باش يضرب ف المغرب اولا و ثانيا باش يحمي راسو من قوات المعارضة.
مصادر كود قالت ان طلبات الاسد السرية باش البوليساريو ترسل مقاتلين تحولات وولات علنية ، مثلا خلال مؤتمر مايسمى بالاتحاد الوطني للمرأة الصحراوية فمخيم اوسرد اللي تدار الشهير الفايت، كان وفد النظام السوري حاضر و خدا الكلمة و بقا كايهضر ليهم على السلم اللي ف سوريا و العروبة و المؤامرة و ديك الهضرة الخاوية و كان رئيس الجبهة حاضر ، و اضاف رئيس الوفد السوري ،قدام الوفود الاخرى اللي جاية من دول داعمة ليهم بحال فنزويلا و شي دول افريقية، انه كايطلب رسميا من البوليساريو تصيفط مقاتلين باش يشوفو “صمود الجيش السوري”.