هند لكلاوي كود الرباط ///
كاينة عصابة جديدة كتبتز باسم العديد من الصحف و المواقع هاد الايامات و من بينها كود. هاد العصابة بانت بعد ما اتصلات بنا ف كود مسؤولة تواصل لوزيرة فالحكومة وهي وزيرة إعداد التراب الوطني والتعمير والإسكان وسياسة المدينة نزهة بوشارب توصلات الثلاث 27 ابريل 2021 مع الجوج و38 دقيقة بميساج فيه هاد العبارة “اتصلنا بك السيدة الوزيرة لكن هاتفك ظل يرن بدون جواب… صحافية من الجريدة كود”.
من بعد قالت هادي اللي قدمات راسها صحافية ف”كود” باسم “لكلاوي” وطبعا هادا كلو كذوب وانتحال صفة باش ينصبو على شركة للعقار٬ ان شي واحد اسمو “الكاتب العام للهيئة الوطنية للصحافة المغربية” تواصل مع الوزيرة على ما سماتو العصابة “ملف فساد شركة عقار”. هنا تغيرات اللهجة وهاجمات هاد المنتحلة صفة صحافية الوزيرة “اخترت التواصل لاعرف رأيك لانك تتسترين على المفسدين”. اييه هادي بوحدها تهمة تغرق الشقف لهاد العصابة.
ووهمات الوزيرة انها كتوجد ملف.
بعد اتصالنا بمستشارة التواصل للوزيرة وباش عطاتنا رقم هاد العصابة اكتشفنا انها تضع صورة لامرأة لاتينية خداوها من انستگرام. الرقم اللي تاصلو بيه وهو 0663836758 مسجل باسم شخص اسمو كريم بن يونس. يعني ان الرقم اللي اتصلو بيه بالوزيرة لراجل.
دابا هادي عصابة كتستغل “كود” واكتشفنا بعد ذلك انها وظفت حتى جريدة “الصباح” فعملياتها. رسلو ميساج اخر فيه تهديد باللي غاديين ينشرو مقال حتى ف”الصباح”. كود” اتصلت بمدير تحريرها خالد الحري اللي لقاتو ما فراسو والو وقال باللي غادي يقدم شكاية ضد مجهول فهاد القضية.
ننتظر من النيابة العامة تتحرك حقاش القضية فيها نصب كبير وتهديد وزيرة في الحكومة وباسم “كود” و”الصباح”.
