عفراء علوي محمدي- كود//

انطلاقا من آخر إحصاء جابتو وزارة التضامن والتنمية الاجتماعية والمساواة والأسرة، نسبة الأمية عند النساء كتفوت نسبة الأمية عند الرجال، بحيث كيبلغ معدل الأمية عند العيالات 44,1 فالمية، بينما عند الرجال كيبلغ 24,8، وهذشي حسب تقرير للمندوبية السامية للتخطيط حول الأمية فالمغرب لسنة 2018.

بالنسبة لمعدل النشاط عند النساء مقارنة مع الرجال، كتقول وزارة التضامن، العدد الأول ديال نشرة المساواة اللي صدراتو اليوم الجمعة، أن هذ المعدل كيبلغ 21,5 فالمية، مقابل 71 فالمية عند الرجال، بينما معدل الشغل عند الناس اللي كتفوت الأعمار ديالهم 15 سنة، فكيبلغ عند العيالات 18,6 فالمية مقابل 65,5 فالمية عند الرجال، ومعدل الأجور ديال الرجال فايت دالعيالات بنسبة 17 فالمية.

والنساء كذلك كيعانيو من البطالة، بحيث 13,5 منهم بطاليات، مقارنة مع 7,8 فصفوف الرجال، وهذ الأرقام جابتهم الوزارة التضامن اخذا عن تقرير للمندوبية السامية للتخطيط لسنة 2019.

بالنسبة للحقوق الاقتصادية، كاين نقص كبير فنسبة العيالات اللي كيسيرو شركات كأشخاص معنويين، بحيث كيشكلو غير 13 فالمية، مقابل 83 فالمية دالرجال، كذلك كاين ضعف ديال، كذلك كاين نسبة قليلة دالنساء اللي فمجلس إدارة الشركات والمؤسسات العمومية، بحيث كاين 42 فالمية مقابل 58 دالرجال.

وحسب تقرير لوزارة الداخلية لسنة 2016، استعنات وزارة التضامن بأرقامو فالنشرة ديالها، فكاينة تمثيلية ضعيفة للنساء فالغرف المهنية: 0,48 فالغرفة الفلاحية، و1,57 فغرف الصيد البحري، و1,61 فغرفة الصناعة والتجارة والخدمات، و3,58 فغرف الصناعة التقليدية.