تدوينة الباحث عبد اللطيف اگنوش ///

العثماني ونبيل بنعبدالله ونزار البركة دارو شي ندوة افتراضية في العالم الافتراضي حول زمن العطب الكوروني!

عطيتكم هنا أسماء أعلام وماشي أسماء أحزاب، ومادرتهاش لوجه الله. لان الناس بثلاثة كانوا مغييبين الاحزاب ديالهوم وكايتكلموا وهوما ناسيين أحزابهوم باستثناء ربما السي نزار البركة لانه ماشي ساهل!! نزار البركة ولد المخزن مقررص وحافظ سوارو مزيان!

الأعطاب بانت ليا جوج وماشي ثلاثة وهي:
١- العطب اللول تقني. شي فيزيبل ديال أجهزة الإرسال “سوطا”، والندوة توقفات شي بركة ديال الوقت وضيعات ربما فرص كثيرة للكلام ديال القادة بثلاثة! الناس غلبهوم “فيزيبل”، ماحساك مشاكل جايحة كورونا وجايحة مابعد الكورونا!!

٢- العطب الثاني هو عطب ديال خطاب السادة القادة للي كل واحد فيهم “كايضرب  على عرامو”.
السي العثماني كعادته، كايدوي بنون الجماعة، وكايگول “حنا غادين نديرو مشاورات مع الاحزاب باش نقومو بتخفيف الحجر الصحي في افق الخروج من الحجر التام، ونباشرو الشروع في حل المشاكل المترتبة على الجايحة من بعد العيد. ونذكر اننا تهللينا في الناس للي مخصوصين وماعندهومش باش يتغلبو على الزمان في زمن الجايحة. ” وزاد گاع الحوائج للي دارت الدولة العميقة وحكومة الظل ونسبها  لهاذيك “نحن”، ونتوما فهمو مزيان بللي السيد كايقصد البيجيدي!!

السي بنعبدالله في كلامو باااين من الطيارة انه مازال متشبث بصاحبو القديم السي بنكيران. وبدا كايقططر الشمع ماشي على البيجيدي، ولكن على العثماني والحكومة للي ضايرة بيه وخاصة الاحرار ديال السي عزيز! السي بنعبدالله گال ليهم نتوما ماكاتعرفوش تتواصلو مع الناس، زعما انا بنعبدالله مامننيش جوج في التواصل بحكم انني كنت وزير واحد النهار ديال التواصل! ثم گال ان الدعم للي عطاتو الحكومة للمعوزين ماكافيش وبزاف ديال البشر ما وصلو والو! كيفاش عرفها؟ غا ماتسولونيش حينت ماعرفتش! ثم زاد قوودها ملي گال ليهم الاعلام الرسمي قام بتهميش الاحزاب وما عرضش عليهم يدويو في التلفزات، ونسى ان الاحزاب ماعندها ماتگول في الموضوع لانها في حالة عطب “والعطب قديم”!!اضف الى ذلك ان السي بنعبدالله ماحاشاهش للنداء ديال لشگر بخصوص “الكتلة” ديال زفت للي كان يغووت عليها هاذي صيمانة!! وبالمختصر المفيد، باكم رايس البيبييس عينو في العثماني وفي أخنوش وفي لشگر وفي المخزن للي مانساش التبهديلة ديال زبلة الحسيمة”

اما السي نزار البركة للي حرايفي كبير في السياسة وتامخزانيت، فخررج كرموصتو من الشريط وتكلم على مجهودات الحزب ديالو لستيقلال في تأطير المواطنين وتوعيتهوم بمسؤولياتهم عبر الانظمة الرقمية، وذككر الجميع بمشكل حقيقي في البلاد وهو “مسألة منسوب الثقة عن الشعب بالنسبة للمؤسسات ديال البلاد”، وگال بلي مجهودات الحزب كولها انصبات على التسريع بالمصادقة على جميع مشاريع القوانين المتعلقة بحالة الطوارئ، مساهمة منه في دعم مجهودات الدولة -وماشي الحكومة- في محاربة الجائحة! وللي زوين في كلام نزار البركة هو تأكيدو على ان حزب الاستقلال واجه بقوة مشروع الاتحاد الاشتراكي المجسد في قانون 20-22! يعني بغى يگول للسي لشگر: سير تلعب نتا “الكتلة الوطنية ديالك”!!

رغم هاذ الكلام لملاوط ديالهم كاملين، كاتبقى ندوة “الاحزاب” بثلاثة فرصة لكل واحد باش يصفي حساباتو مع المنافسين الاخرين، بينما حكومة الظل والدولة العميقة تعيش في جنة النعيم السياسي، وخوتي الزوعاما بثلاثة في عطل قديم!!