سهام البارودي – كود//

قليل فاش غاتسمع شي راجل فرحان بقانون التحرش الجديد لي يا الله بدا كايطبق، نسبة كبيرة من الرجال لي كانعرف جاهم هاد القانون غير ” زيادة فيه و صافي” غير ” خضرة فوق طعام ” بالمتديينين بالحداثيين كلهم تافقو على عدم جدوى هاد القانون! و فاش كانشوف ردة الفعل ديال الاغلبية د الرجال المناهضين لهاد القانون كايجيوني كاينقاسمو لجوج ديال المجموعات:

كاين داك الراجل لي كايقوليك ” وايلي عيقتو ” ! مالنا شنو كايطرا گاع ؟ شنو كايوقع گاع ؟ ! علاش كاتشكاو من التحرش تالهاد الدرجة ! انسان كاينگ عليك فالزنقة عجبتيه عادي ! خليه يهضر ! علاش غاتوصلو تال الحبس و الغرامة و كدا ؟ هاد النوع كايكون ساذج نوعا ما ! مكلخ شوية ! حيت ماعمرو جرب يكون مرا فالمغرب داكشي علاش كايحل دلقوشو بفحال هاد الهضرة  ! آ سمع آ سيموحمد الله يجازيك بيخير ! هاد القانون ديال التحرش الوحيدين لي مؤهلين انهم يهضرو عليه و يناقشوه هوما العيالات أولا !  حيت هوما المعنيين بالدرجة الاولى بأضرار التحرش!

نتا لي جاك قانون التحرش غير ” زيادة فيه ” واش عمرك خورك شي حد فالزنقة ؟ عمرك كنتي دايز و تبعك شي واحد لاصق ليك فزكك كايزنن على ودنيك. طبعا لا داكشي علاش كاتهضر على المغرب فحال السويد !

عندي صديقة مغربية عايشة فبلد افريقي ! من دول جنوب الصحراء المقودة عليهم و لي تا الطريق ماعندهمش صحيحة ! و فاش كاتجي تزور عائلتها فكازا كاتقوليا كانخاف نخرج بوحدي ! كانخاف من نظرات الرجال فالزنقة و خصوصا من التحرش ديال بعض بوزبالات لي لا لصقك ماكايتفاكش معاك ! ” وا عطينا النمرة” ! ” وا دوي معانا ” ” تشواضعي معانا” ” هاه شوفي ! راه مايخصك تا خير ”  ” وا كر عندك …” … السيدة كاتقوليا بلي فالبلاد لي هي عايشة فيها كاتخرج كولا صباح دير جوگینغ ديالها حدا البحر بشورط و بلي حتى واحد ماكايديرونجيها ! و لا تجرأ شي واحد غايقوليها ” بونجوغ ” جاوباتو و بانت ليه مهتمة غايزيد يهضر معاها ! نخلاتو غايمشي فحالاتو.

هادشي فدولة من الدول لي بزاف ديال المغاربة كايشوفو راسهم واعرين عليهم ! فدولة من افريقيا جنوب الصحراء !

لي خاص يعرفو هاد الرباعة ديال السذج ! هوا راه صعيبة تعيشي كمرأة فالمغرب ! و تخرجي للزنقة و تمشي للمارشي فراحتك ! راه كانعيشو معاكم فالفضاء العام كي الفيران طالبين غا التعادل ! خاصك تلبسي طويل ! ماتلبسيش الشورط ! ماتلبسيش الكسوة ! ماتبينيش بزازلك ! باش مايديرونجيك حد فالزنقة ! أما شي قنات فالمغرب راه خاصك تلبسي فيهم الجلابة و شوف تشوف ! كانحرمو راسنا من بزاف ديال المتع فالحياة غا باش مايجيش شي ولد القحبة و يخصر ليك نهارك ! مايمكنش مثلا نلبس شي كسوة و نمشي نجلس فجردة طرونكيل و نقرا شي كتاب بلا مايبعت عليا شي ميكروب يفرع ليا مخي ! و لا نهر فوطتي و نمشي نتبحر بلا مايجي شي ميكروب يفرع ليا مخي ! خاصك تعيشي فالظل و تسايسي و تكايسي و دوزي من هنا ماشي ملهيه و تشري طوموبيل باش مايبوانتيش عليك شي ولد القحبة فالطوبيس! و تخباي ! و تشدي طاكسي ! و ماتمشايش لمسافة طويلة بوحدك ! و مادوزيش من حدا رباعة ديال الدراري بوحدك ! لا زعما كانعيشو كي الفيران ! وا بقاو غا المدرعات و الدبابات ماتخشاوش فيهم المغربيات !

راه أول سؤال كايطرحوه بزاف ديال العيالات فاش كايكونو خارجين للزنقة و هوما كايختارو الحوايج هوا شحال الاحتمال باش دوك الحوايج يجبدو ليها الصداع ! و لا يجبدو الصداع لراجلها و لا لصاحبها … يصدق مضارب مع شي قمقوم.

راه كاينين شي احياء و شي قنات فالمغرب مايمكن للمرأة فيهم إلا انها دير الدرة و الجلابة و لا الخمار باش تعيش فيهم ! باش ماتصدقش مسببة شي كارثة لراسها و لا لعائلتها ! مفروض عليها تتخبا وسط الدرابل و تخفي الأنوثة ديالها باش مايتحرش بيها و مايقرب ليها حد.

و كاين النوع الثاني و لي هوا النوع ديال ولاد القحاب بامتياز ! المتحرشين ! المغتصبين ! الميكروبات لي حسو بلي هاد القانون كايحطهم فخطر هوما شخصيا و كايمنع عليهم واحد الفرصة زوينة لفريع الكر للبنات ! القانون لي حيد ليهم واحد المتعة ! حيد ليهم واحد الحق ديال الازعاج كانو كايمارسوه اتجاه العيالات ! و كايمارسوه بالفور يا الشيفور ! و لا هضرتي معاه كايقولك ” آ سيري يا القحبة كون كنتي غا زوينة ” و ملي أنا مازويناش علاش تابعني يا ولد القحبة ! صحاب ” اذا كان العري حرية شخصية فالتحرش واجب وطني”

لهاد النوع الاخير خصوصا ! كانقول ! ها نتا نشاعالله غاتأدي الواجب الوطني ديالك فالعاذر و لا مول البرگي نشاعالله الرحمان الرحيم ! غي وجد سانيكروا ! باش تسيق الكروا !

يا الله لوي عنگك !