عفراء علوي-كود//

لبارح الثلاثاء جات نبيلة منيب، الأمينة العامة للحزب الاشتراكي الموحد، للمعرض الدولي للنشر والكتاب، هي والزوج ديالها، وتقدات منو بزاف ديال الكتب، وتحديدا من المركز الثقافي العربي، وخلصات بالشيك.

فتصريحها ل”كود”، قالت منيب بللي قدومها للمعرض هو نتيجة لحبها الكبير للكتاب وشغفها بالقراءة، وعبرات على الحزن ديالها لضعف نسبة القراءة فالمغرب وفالعالم العربي.

وقالت منيب “من المؤسف الشباب مايقراوش، ومايكونوش واعيين بأهمية الكتاب، ومايحبوش الكتاب، ولهذشي خاص يتم تشجيعهم على القراءة وتخفيض ثمن الكتب”.

وعن ثمن الدخول للمعرض واللي هو 10 دراهم، قالت منيب “خاص يكون الدخول للمعرض بالمجان لكَاع الدراري الصغار والشباب، طبعا اللي موظف راه قادر يخلص تذكرة الدخول، لكن الشباب والأطفال والطلبة غالية عليهم.

منيب خدات من دار النشر اللي دخلات ليها 7 ديال الكتب، وكيتعلق الأمر ب”السياسة والدين في المغرب” لحسن أوريد، و”تاريخ المغرب” لدانييل ريفيه، و”نظام التفاهة” ل”آلان دونو”، ثم كتاب “نقد العقل السياسي” ل”ريجيس دوبريه”، و”تاريخ الشعوب العربية” ل”ألبرت حوراني”، وكتاب الأمير ل”نيكولا ميكيافيلي” ثم ثلاث نسخ من كتاب “التفكير في زمن التكفير” لصاحبه نصر حامد أبو زيد.

وعبرات منيب عن رغبتها فاقتناء كتاب زكية داوود “عبد الله إبراهيم: تاريخ الفرص الضائعة” اللي مالقاتوش، فضلا عن كتاب ” عبد الرحمان اليوسفي دروس في التأريخ” لإدريس الكراوي، وكذلك كتاب هشام نويتيك “حوار مع المسلم اللي ساكن فيا”، هذ الأخير اللي انبهار بعدد مبيعاته اللي تجاوزات 500 نسخة فظرف أربعة أيام واللي خلاه يتقاضى فخطرة من المعرض، وهذشي جاب ليها فضول كبير باش تشريه وتتعرف على مضمونو.