عفراء علوي محمدي- كود//

على خلفية شكاية كان حطها ضدها سيرج بيرديكَو، الأمين العام لمجلس الطوائف اليهودية، بسبب جرائم التشهير والسب والقذف الإلكتروني فحقو، تم استدعاء المواطنة اليهودية المغربية (ل.ب) من طرف رئيس فرقة محاربة الجرائم المعلوماتية دالشرطة القضائية لولاية أمن طنجة.

هذ الدعوى كان رفعها ضدها بيرديكَو والمواطنة إيمان يونس، اللي كان سبق ليها قالت فتصريح ل”كود” أنها تعرضات للتشهير من طرف (ل.ب) فقط لأنها عبرات على الرفض ديالها لشنو كتدير هذ الأخيرة، اللي دارت حملة انقلابية على بيرديكَو، وطالبات بإعادة الانتخابات، وبغات تجيب يهود راديكاليين لا علاقة ليهم باليهود المغاربة يسيرو الطوائف بلاصتو.

و(ل.ب) حطات الاستدعاء ففيسبوك ديالها، وقالت أن التحقيق محاط بالسرية وماتقدرش تتكلم على مجموعة من النقاط اللي تثارو فيه.

وقالت أنه واخا يوقفو فطريقها، غاتبقى مستمرة فالنشر فالمجموعة ديال ففيسبوك، على التراث الديني والثقافي اليهودي للمغرب، وعلى إنشاء وتطوير الاتفاقيات الموقعة بين المغرب وإسرائيل فمختلف المشاريع، وعلى التنمية الاقتصادية للمغرب، كيف غتبقا مازال تتكلم المرشحين المحتملين للانتخابات لمنصب بيرديكَو.

وكانت قالت يونس أنها تعرضات، هي وبيرديكَو، للتشهير، بحيث لاحت تصاورها هي وياه واتهماتهم بممارسة الجنس، وسباتهم وعايراتهم، غير حيت وقفو فطريقها بسباب رفضهم لداكشي اللي كتدير، بحيث جمعات يهود فمجموعة د”واتساب” باش تحيد بيرديكَو من المنصب ديالو، واخا “ماسمع ليها حد وبداو الناس يخرجو من المجموعة وبدات تهضر بوحدها، كيف أن الانتخابات مايمكنش تدار قانونيا لأقلية فيها أقل من 5000 واحد”، كيف سبق قالت يونس ل”كود”.

https://m.facebook.com/story.php?story_fbid=4877998865574479&id=1292968250744243