كود سبور//

الموقع الفرنسي “So Foot”، دار تعليق مستفز وعنصري وماعندو معنى ف حق المغاربة من خلال الدولي المغربي أشرف حكيمي لاعب باريس سان جيرمان ، وهادشي بعدما ربح الفريق الفرنسي بصعوبة لبارح الثلاثاء ضد لايبزيگ الألماني، ف الجولة الثالثة من دور مجموعات دوري أبطال أوروبا.

وعلق الموقع الفرنسي على اللعب ديال حكيمي ف الماتش، وكتب “فاش مكيسمموش الماكلة ديال خصومهم، فالمغاربة كيكونو أقل إثارة للإعجاب”.

وعطى الموقع 4 نقاط لحكيمي، وجاب 4،6، ف استفتاء داروه لمتابعي “So Foot”.

ومن بعد هاد التعليق المتهور، تعرض الموقع لبزاف ديال الانتقادات، حتى اظطر انه يبدل داكشي اللي كبت ويعطي تفسير لهاد الغباء.

وف التعليق الجديد كتب “So Foot”: بدلنا النص الاصلي ديال اشرف حكيمي، حيت المضمون ديالو تفهم غلط، ماعمرنا مابغينا نجرحو ولا نسيؤو لشي واحد، هادشي ضد مبادئنا.