كود سبور//
نايضة هاد ليامات بين محمد بودريقة، الرئيس السابق للرجاء البيضاوي والرئيس الحالي جواد الزيات على المليار.
بودريقة طلب من مكتب الرجاء يرجع ليه مليار سنتيم، اللي سبق ليه سلفو للفريق منين كان رئيس، وقرر يصعد أكثر، خصوصا بعد تصريحات الزيات الأخيرة، اللي أكد فيها أنه بحث فالوثائق ومالقاش مليار بودريقة.
هاد التصريح قلق بودريقة، وهدد بنشر، كل الوثائق، التي تؤكد انه كايسال للرجا مليار سنتيم، في حسابه الخاص على موقع التواصل الاجتماعي، وأكثر من هادشي كامل هدد يمشي للقضاء، باش يرجع فلوسو.
وكشفت مصادر مطلعة ل”كود” أن الزيات رجع كيساوي فاش شاف العين حمارت، خصوصا أن بودريقة عندو ما يفيد أنه كايسال المليار.
هاد المصادر أكدت أن بودريقة طلب اجتماع عاجل مع الزيات لوضع النقاط على الحروف باش يرجع فلوسو ومريضنا ما عندو باس، والا غادي يمشي للمحكمة خلال الأيام القليلة المقبلة.
