عفراء علوي محمدي- كود//

حصلو الجدارمية، لبارح الأربعاء فإقليم ميدلت، وبالضبط فباكوديم دائرة بومة، جوج دالناس كيشارجيو طوموبيلة (بيكوب) من نوع “بوجو ترانزيت” ماعندها ماتريكيل ومامعروفاش ديالمن، بالخشب ديال أكثر من 12 شجرة باش يمشيو بيها لوجهة ما، لكن بمجرد ما شافو الجدارمية خلاو طوموبيلنهم وهربو بجوج، واستطعو السلطات يحجزوها.

وهذشي وشدو الجدارمية نجارة لقاوهوم خدامين كيهرسو فالخشب ديال شجر الأرز فآتوليي ديال النجارة بدوار تمالوت جماعة انمزي قيادة أكوديم، وحجزو كمية الخشب اللي كانت تماك، وتابعو مول لآتوليي.

وغير قبل سيمانة كانوا سكان منطقة تونفيت، التابعة لجماعة ميدلت، عبروا على استنكارهم لقطع شجر الأرز بأذمر أوبوهو فالقطاع الغابوي إيدكَل.

وفي اتصال سابق ل”كود” مع بعض سكان المنطقة، قالوا بللي مجموعة من الأشخاص المجهولين قطعوا فالليل  سبعة ديال الشجرات من الشجرات الكبار فالمنطقة، واللي عمرو سنوات، وسرقو الخشب ديالها فالظلام وما شافهم حد.

وطالبو السكان مصالح المياه والغابات فالمنطقة باش تدخل على الخط، وتحضي الغابة من بحال هذ الأمور، كيف طالبو السلطات باش تفتح تحقيق فالموضوع اللي اعتبروه “جريمة بيئية كتهدد الغابة ومستقبل الناس ديال الأطلس ككل”.

وهذي ماشي أول مرة يوقع هذشي، حيت غير قبل شي أيام لقاو سكان المنطقة بزاف ديال الشجر مهرس ومكَلع من بلاصتو.