سعيد الشاوي -كود كازا //

كان الموسم الجامعي ديال 2022/2023 دايز في امان الله سكوتي فجامعة الحسن الأول بسطات، احتى خرجات نقابة الإتحاد المغربي للشغل UMT بيان قاصح شوية كتقلي فيه السم للكونفدرالية الديمقراطية للشغل CDT، بحيث دارت نقابة موخاريق واحد ميسة خطيرة بزاف وراه دات ليه شي 50 موظف اغلبهم من كلية العلوم والتقنيات، دارو هجرة جماعية لعند الميلودي موخاريق.

البيان كيأكد على هجرة جماعية وعلى ان موخاريق دخل ليها بسباطو باستراتيجية من سعد النقابي والاطار بالمدرسة الوطنية للتجارة والتسيير بسطات، وتزادت عليه النقابية والموظفة فاطمة أسدي من كلية العلوم والتقنيات، لي كانو دوروها الناس ديالو النقابة ديالها وخلاوها تغادر الكونفدرالية الديمقراطية للشغل من بعد سنوات من النضال، كانت نتيجتها الخذلان.

الكونفدرالية الديمقراطية للشغل سكتات على فضايح كبيرة بحال الجنس مقابل النقط والمال مقابل النقط والتوظيفات المشبوهة، حيت استفادوا من الترقيات بإيعاز من الكاتب العام الكلية ودخلو للماسترات بدعم مباشر من منسق ماستر المالية العامة لي سدوه ليه، ولي حالوه على على اللجنة العلمية مؤخراً من طرف أعضاء المجلس التاديبي.

هاد المگارعة لي ناضت ديال النقابة غادا تفرگع شلا رمان وغادي يبدا مسلسل الفضح لي موحال واش يسالي مزيان