إعداد و تصوير: سفيان جبروني – گود الرباط//
فالنهار السابع من الدورة اللولة من مهرجان ” Rab’Africa راب أفريكا”، اللي كتنظمو وزارة الثقافة والإتصال، بمنصة شاطئ أبي رقراق بالعاصمة الرباط، طلعات الرابورة “ختك” باش تغني.
من بعد ما سالات “ختك” وهبطات لقات صحفيين منهم صحافي ديال “كود”، كيتسناوها باش تعطيهم تصريحات، ولكن الرابورة طلبت منهم يزيدو يتسناوها 10 الدقايق حتى تشرب الما و ترتاح و عاد تجي عندهم يصورو معاها.
من بعد مدة طولة و الصحفيين كيتسناو جا المنادجر ديال “ختك” قالهم أنه مغاديش تخرج عندهم ولكن هوما غادي يدخلو عندها، وكل صحفي بوحدو باش يصور معاها حيت مباغاش الفلاشات بزاف و الأضواء. وحتى لهنا كانو الصحفيين باقين موافقين و تافقو باش كل واحد يدخل بوحدو.
ولكن ختك بقات كتشرط على الصحافة و قالت ليهم متسولونيش فشي حاجة من غير المهرجان، واضافت انها خاصها تشوف الفيديو والى مابنتش زوينة مايدوزش وتعاودو.. وزادت: خاصكم تجيبوني زوينة فالكادر، يعني الى جا الفيديو خايب غادي تمسحوه.
وفاش بقات “ختك” مريحة فالقاعة كثر من نص ساعة ومخليا الصحافيين واقفين بلا مايجي حتى مسؤول يتواصل معاهم، قررو هاد الاخيرين يخليوها حتى تخرج و يمشيو و يخليوها بدورها واقفة بوحدها.
ومنين خرجات هادشي لي دارو. و المنادجر ديالها لي كان كيتشرط على الصحافة ولا كيعايرهم و يقوليهم أن هادشي لي دارو ماشي مهني و غادي يوصي عليهم گاع الروابا ديال المغرب باش يوليو ضدهم.
