الوزير الاول المالي: المغرب بلد صديق كتعتمد عليه مالي لمواصلة إعادة البناء
سهام البارودي – كود//
ايه من حقها تلبس لي بغات طبعا و تعري شعرها و تهلا فراسها و دوز لي فاكونص فباريس و لا فالهونولولو گاع ! و تزوج و لا طلق سوقها هاداك و حياتها هاديك.
ولكن انا عندي بعض الاسئلة و لي كايهموني انا شخصيا
اولا و هوا السؤال الاهم : باش كادوز دوك لي فاكونص ؟ واش بفلوسها و لا بفلوس دافعي الضرائب ؟
لاكانت بفلوسها الله يسهل عليها
لاكانت بفلوس دافعي الضرائب ! انا بعدا شخشيا بغيت رزقي يرجع ليا نتبرع بيه انا نيت و نسافر بيه.
ثانيا : كيفاش يمكن لهاد السيدة تجمع بين بزاف ديال المناصب بلا مايكون حتى شي قانون كايمنع هادشي !؟ برلمانية و عضوة فالمجلس الاعلى للتربية و التكوين و عضوة فالمجلس البلدي لتزنيت و المجلس الجهوي لسوس ماسة ! وايلي هادو كلهم مسؤوليات ؟ وواش كلهم كاتخلص عليهم ؟ لاكانو بصح گاع هادو مسؤولياتها و فعلا كاتخلص عليهم راه ضروري شي قانون يمنع هاد مراكمة المناصب فحالا كاتراكم التكاشط! مايمكنش انسان عادي كايعيش فنهار فيه ربعاوعشرين ساعة يتحمل گاع هاد المناصب و يأدي المسؤولية لي عليه بكل تفان واخا تكون نيتو حسنة ! هنا كايحضر داك مبدأ ربط المسؤولية بالمحاسبة و هنا كايحضر الدور ديال القانون لي خاصو نورمالمو يمنع انه ” العمل السياسي” يكون هوا مصدر العيش ديال شي واحد و لا شي وحدة ! حيت فاش كايولي الانسان عايش بالسياسة و كاياكل منها طرف د الخبز و كايقلب يتغنى منها گاع راه شي حاجة ماشي هي هاديك ماشي فداك الانسان انما فالقانون لي ماكاينظمش هاد المسألة.
ثالتا ! لاكانو دوك الصور حقيقية، راه من حق اي واحد ينتاقد ازدواجية الخطاب لي عند الخوانجية ! حيت الحجاب ماشي ستيل ديال اللباس عادي و صافي لا ! الحجاب اديولوجية ! الحجاب فكر ! و فكر عندو جذور طوال و ناس كايطبلو ليه و خسرو الفلوس باش يديرو ليه بلاصة وسط المجتمع ! الحجاب راه فكر دوك الناس لي كايشوفو المرا عورة خاصها تغطى باش ماتثيرش الفتنة.
داكشي علاش نورمال فاش تجي طبل ليا بالحجاب و تربح الاصوات الانتخابية بالحجاب و دوز مدة و نلقاك بلا حجاب نسولك كي درتي ليها ؟ خصوصا لا كنتي شخصية عمومية !
و بالنسبة للحرية الشخصية! انا كانآمن بأنه الحرية باش تستاحقها و تستاحق تستافد منها خاصك تكون كاتآمن بيها ! و ماشي كاتآمن ببعض الحرية و تكفر ببعض ! لا كاتآمن بيها كاملة و فالبعد ديالها الكوني.