عفراء علوي محمدي- كود//

قلل الرئيس الفرنسي، إيمانويل ماكرون، دافع على الطالبة “ميلا” اللي انتقدات الإسلام ففيديو نشراتو على مواقع التواصل الاجتماعي ، وقال انها ما دارت والو، حيت التجديف ففرنسا ماشي جريمة.

واضاف ماكرون، فتصريح صحفي حول حرية الرأي والتعبير، بللي الطالبة مازالة مراهقة وتعرضات لتهديدات بالقتل والتصفية الجسدية، وخرجات بسبابها من المدرسة، وهادشي كان غادي يدمر ليها حياتها.

وزاد ماكرون قال: “خاصنا نحميو ميلا فالمدرسة اللي ولات تقرا فيها دابا بتدخل وزارة التعليم، ونحميوها كذلك فحياتها اليومية، وفكل تحركاتها، وماننساوش ان فالجمهورية الفرنسية، القانون واضح، عندنا الحق فالتجديف، والانتقاد  وحتى نكاريكاتوريو الدين، اللي مقدس هو حرية الرأي فقط، واللي خارج القانون هو الكراهية والتهجم على الناس”.

وجا تصريح ماكرون بعد الانتقاد الكبير اللي تعرض ليه وزير العدل نيكول بيلوبت فاش قال فتصريح ليه للصحافة بللي الفعل اللي قامت بيه “ميلا” هو “اعتداء على حرية الضمير”، واخا فنفس الوقت اعتبر تهديدها بالقتل ” غير مقبول”.

وكانت “ميلا” تعرضات لانتقادات كبيرة وصلات حد السب والشتم والتهديد بالقتل، فيناير اللي فات، من بعد ما نشرات فيديو تتنتقد فيه الإسلام.

وقالت “ميلا”، فبرنامج “كوتيديان” على قناة “TMC”، بللي هي ماندماناش على كاع داكشي اللي كتنشر فصفحاتها ف”يوتوب” و”فيسبوك”، وقالت “بالعكس أنا كنعبر على رأيي، ومن حقي ننتقد الحوايج اللي كايجيوني ماشي هما هدوك فالإسلام أو ننتقد الإسلام كامل”.