نجوى المالحي-كود//

الممثل هاشم البسطاوي ولد محمد البسطاوي وضح علاقتو بالممثلة نسرين الراضي من بعد قضية البوسة بوش آ بوش مع الممثلة لبنى أزابال في مهرجان “كان’.

البسطاوي، ومن بعد ما مسح تصاورو كاملين معاها في انستكَرام، رجع البارح وحط تصويرة ديالهم بجوج وكتب عليها بأنها صديقة حقيقية وممخاصمينش كيفما كيروج، وكتب ليها “حافظي على التمثيل ديالك، راكي واعرة”.

من جهتها، نسرين دارت تصويرة “ويلسون” الكرة الشهيرة في فيلم “cast away” ديال طوم هانكس لي كيحكي قصة واحد طاحت بيه الطيارة وبقا بوحدو في جزيرة، بحالا زعما كتمعني بالضحك انها مور هادشي بقات بوحدها.

وفي التعاليق كانو بزاف ديال الانتقادات، والمعيور ماع بكلام جارح لي غادي يكون بدون شك أثر فيها.

الناس عندنا فهاد البلاد مازال مابغات تستوعب الحرية الفردية واحترام الاخر مهما كان مختلف علينا. مازال تابعين قيم ومبادئ قروسطية تسالات صلحيتها ف 1819.