اسماء غربي – كود//
بعد الصداع اللي ناض على ال”الكوبي كولي” من سيتكوم مريكانية، فضيحة اخرى ضربات الكوميدي سعيد الناصري بطل سيتكوم “البوي”.
السيناريست محمد نوماق، اللي سبق ليه تلاقى الملك، اتاهمو بالسرقة والنصب واكد انه هو اللي كتب سيناريو “البوي” بعد طلب من سعيد الناصري.
وقال محمد نوماق في بوسط حطو فصفحتو على الفيسبوك:”…في 2016 ومع قرب حلول رمضان، اتصل بي وسألني هل تستطيع كتابة سيتكوم لتعرض في رمضان… عكفت على كتابة أربع حلقات وبعثتها له في بريده الالكتروني…أعجب بها جدا… مرَّ رمضان تلك السنة واعتذر مني بأن الهاكا تحاصره وترفض أعماله . تقبلت الأمر ولم أبد له امتعاضي”.
واضاف نوماق ان الناصري، بعد ذلك بقليل اتصل بيه وطلب منو يترجم ويقاد سيناريو اخر، وماطلبش منو نوماق الفلوس حتى تزير، وفاش مشى تلاقاه فكازا، جا الناصري فالكاط كاط ديالو وبلا ماينزل منو، هبط الجاجة ولاح ليه 600 درهم.
وقبل بداية رمضان هاد العام، شاف نوماق عبر إعلانات ان سيتكوم البوي بدات دوز فقناة شذى TV، وفاش تعصب وحاول يتاصل بالناصري، قال انه بلوكاه.
وختم نوماق البوسط ديالو قائلا: “هذا سعيد الناصري اللي كيتخبا وراء ابتسامة مزيفة مدعيا أنه ابن الشعب والناطق بتباريحه، حتى الفن لم يسلم من الفساد في هذا الوطن”.