الرئيسية > آراء > من بعد صورة منال بنشليخة مع راجلها بالبيكيني.. شي عيالات متخلفات طيحو علينا الذل.. قاليك الراجل هو اللي يتحكم فالمرا ويغطيها بالشراوط وخاصها تطيعو وتخدمو.. أودي دخلو سوق راسكم !! عايشين بحال العبيد وبغيتو تفرضو العبودية على العيالات الحرات صحا
11/07/2020 15:00 آراء

من بعد صورة منال بنشليخة مع راجلها بالبيكيني.. شي عيالات متخلفات طيحو علينا الذل.. قاليك الراجل هو اللي يتحكم فالمرا ويغطيها بالشراوط وخاصها تطيعو وتخدمو.. أودي دخلو سوق راسكم !! عايشين بحال العبيد وبغيتو تفرضو العبودية على العيالات الحرات صحا

من بعد صورة منال بنشليخة مع راجلها بالبيكيني.. شي عيالات متخلفات طيحو علينا الذل.. قاليك الراجل هو اللي يتحكم فالمرا ويغطيها بالشراوط وخاصها تطيعو وتخدمو.. أودي دخلو سوق راسكم !! عايشين بحال العبيد وبغيتو تفرضو العبودية على العيالات الحرات صحا

عفراء علوي محمدي- كود//

عند المتخلفين والميزوجيينيين وبنادم اللي ماقاري والو ومافاهم حتى زفتة فحقوق الإنسان والمساواة، الأصل هو الراجل يتحكم فالمرا، ويديرها خاتم فصبعو، سوا كانت مرتو أو ختو أو بنتو، خاص باش يتسمى راجل يخدمها عندو كي التراسة، ويصرف عليها باش تبقى عالة عليه، وخاضعة ليه، وعلاش لا يمرمق معاها جوج تمرميقات إلى شي نهار عارضاتو، أو قالت نص كلمة ماعجباتوش.

وفوق هذشي كلو خاص المرا ماتلبسش اللي بغات حي “لحمها ماخاص يشوفو تاواحد من غير راجلها”، حيت شاريها بفلوسو، وعاطي فيها صداقو، وديالو بوحدو، تماما بحال شي أوبجي ديال ماليه، ماعندو لا عقل لا روح لا رغبات لا إرادة، بحال شي قاصر خاصها ضروري من ولي الأمر أو شخص وصي عليها، أو كثر من هذشي، شي كركوزة خاص اللي يتحكم فيها ويحركها كيف بغا، ويغطيها مزيان بالشراوط، ويبزز عليها تلبس الحجاب، وخاصها فالمقابل تطيعو وتدير داكشي اللي بغا بدون نقلش واخا ماتكونش مقتنعة بيه…

المشكل أن بحال هذ الأمور كيآمنو بيها ويدافعو عليها العيالات كثر من الرجال ومطيحيت الذل، كاينة المرا اللي كاتقليك “أنا باغة راجل يتحكم فيا ويضربني وما يخلي اللي يضربني”، وماتبغيش راجل اللي يخليها تعيش حياتها كيف بغات وتحقق ذاتها وطوموحاتها، لا.. باغة “راجل”، يديرها تحت السباط ويجف بيها الأرض ويجيبها غير باش تخدمو وتطيعو، وضاروري ما تلبس الشراوط وتستر، وإلى ما سترهاش “ماشي راجل”.

والمعظلة الكبير كَاع ماشي غير فهذشي، لكن فكون أن هذ العيالات اللي ختارو العبودية باغيين يفرضوها على كلشي، وكيخرجو لمواقع التواصل الاجتماعي ينشرو الكلاخ ديالهم على نطاق واسع، ويحرضو الرجال على التحكم فالعيالات “إلى بغاو يبقاو رجال فحلين وحقيقيين”، ويعايرو ويسبو كَاع الرجال اللي كيعيشو مع عيالاتهم على قدم المساواة، بعيدا عن منطق تحكم فيا نتحكم فيك.

المغنية المغربية منال بنشليخة مؤخرا حطات صورة عادية مع راجلها منصف بالبيكيني وشورط ديال الدجين، طبعا دابا الصيف والحال سخن ومن حق أي واحد يتعرا ويتبحر بسبب هذ الموجة دالحرارة اللي ضاربة البلاد، لكن المتخلفين شافو الموضوع من ناحية أخرى: هي عاهرة كاتعرا فالسوشل ميديا، وهو ديوث حيت مكايغيرش على مرتو ومخليها تلبس اللي هكذاك، فالوقت اللي الصورة عادية جدا ومافيهاش كَرام ديال الإثارة اللي ممكن تخلي هذ المتخلفين يخرجو يسبو فالناس ويتدخلو ليهم فحياتهم الشخصية بهذ الطريقة ويحرمو عليهم متعة الصيف بالسبان والتشهير والكلام الخايب.

المتخلفات حتى هوما خرجو يعلقو بكلام أكثر تخلفا، ويسبو ويشتمو الكوبل، وينشرو فالحقد والكراهية والجهل، وحدة قالت ليهم “هذا ماشي راجل ماكيغيرش على لحم مرتو”، ووحدة خرى كتشوف فالزواج غير العبودية قالت “ماعندي ماندير أنا براجل مايتحكمش فيا ويخليني نلبس مستور احتراما ليه”، بلا ما نهضرو على هذوك الفقيهات اللي بداو يستشهدو بالآيات القرآنية ديال “الرجال قوامون” و”يضربن بخمرهم على جيوبهن”، وبغاو يفرضو صحا معتقداتهم على النساء الحرات.

أودي تعلمو تدخلو سوق راسكم !! وخليو الناس تعيش، وتلبس اللي بغات، علاش ديما تسبو وتشتمو وتعايرو الناس؟ واش هذا كلو حسد؟ وعلاش العيالات يخرجو تاهوما يغوتو آش حرقهوم؟ تلبس بيكيني ولا ماتلبس والو كَاع مع راجلها ولا صاحبها آش دخلكم؟ علاش كتعيشو العبودية وبغيتو كلشي يولي عبد بحالكم؟ تعلم تدخلو سوق راسكوم وقولو كلمة زوينة أو سدو دلاقشكم !!

موضوعات أخرى

29/03/2024 06:00

العراقي لي حرق القرآن فالسويد علق لبلاد خرا.. غادي يطلب فيها اللجوء بعدما قررات ستوكهولم تجري عليه