نجوى المالحي-كود//

من بعد خروجها من السبيطار، قررت اليوتوبوز إكرام بيلانوڤا، تشارك مع المتتبعين التجربة ديالها، خصوصا أنها عانات من ضغط نفسي خلاها تدخل للمستشفى باش تتعالج، وهادشي كان كثر عليها القيل والقال.

إكرام لي كتعيش في ألمانيا، ولي كتعتبر من مشاهير اليوتوب في المغرب، قالت أنها فعلا كانت كتعاني من إدمان، ولكن ماشي إدمان ديال المخدرات كيف قالو عليها، ولكن إدمان الروتين، وتكرر الأشياء والأعمال لي كدير في البيت.

بيلانوڤا قالت في فيديو قرب يحقق مليون مشاهدة غير في 18 الساعة، أن دخولها للسبيطار كان هو الحل الوحيد، وما ندمتش عليه، لأنها وصلت لمرحلة كن ما دخلاتش كن تسطات بقوة التفكير، والعياء الجسدي، بالإضافة أن كلشي منها.

وقدمت اكرام بيلانوڤا بزاف ديال النصائح للعيالات، خصوصا المغتربات بحالها، باش يتهلاو في راسهم وما ينهكوش الجسد ديالهم، ويرتاحو في الوقت لي يحسو فيه بالعياء.