كود – عن لوموند//
صحيفة “لوموند”، فعددها ليوم أمس الأحد 28 مارس، نشرات روبورتاج على الحراكَة بجبال الألب الفرنسية، اللي استغلو الظرفية الوبائية باش يقطعو الحدود بلا وراق عن طريق جبال الألب نحو بلدية مونجونيفر الفرنسية.
هوما العشرات من المغاربة والتونسيين والجزائريين والمصريين والإيرانيين والأفغانيين، يعتمدو لانتينيرير فتيليفوناتهم، وكينسقو بيناتهم باش يمشيو أون كَروب فهذ الرحلة المحفوفة بالمخاطر، ودرجة الحرارة كانت فهذ الليلة -5.
باش يوصلو لمونجونيفر، خاصهم يتمشاو عشرات الكيلومترات لمدة 5 ساعات، على ارتفاع ديال 1800 متر من على سطح البحر.
كريم، تونسي عندو 43 عام، هو اللي كيكَيدي المجموعة، ومابقى باغي حتى خطأ، من بعد ما كانو حصلوهم البوليس ورجعوهوم للطاليان.
الكَروب غاديين فالظلام والثلج، بالسكات وبلا صداع، وشيمرات كيوصليهم الثلج حتى للفخاض.
وماشي غير الرجال أو غير الناس اللي بوحدهم اللي كيخوضو غمار هذ المغامرة، “لو موند” كشفات انه كاين حتى أطفال صغار، وأطفال يالاه تزادو، وعائلات، وعيالات، ومع هذ الكروب كانت مرا أفغانية حاملة.