كود سبور//

المنتخب المغربي للفوتصال فاز بلقب دوري دولي فالشينوا البارح الثلاثاء، بعدما اربح الماتشات كاملة.

فاز على منتخب ماليزيا بثلاثة لجوج والصين بخمسة لزيرو والدنمارك بأربعة لثلاثة.

جميع هاد الماتشات أكد فيهم المنتخب ديال الفوتصال قوته وأسلوب لعبه، وبان بلي المنتخب عازم باش يدافع على اللقب الافريقي، الذي فاز به في جنوب إفريقيا في 2016.

بزاف ديال اللعابة تالقوا في الشينوا، وكان لهم دور كبير في انتصارات أسود القاعة بحال إدريس فاني، لي ماركا جوج فماتش الدنمارك وسعد كنية وسفيان مسرار.

وأكثر من هادشي فاز اللاعب سعد كنية بجائزة أفضل لاعب في الدوري ورضا الخياري أحسن حارس مرمى.

هاد النتائج ماكانش غادي تكون لولا العمل الكبير لي كيقوم به المدرب هشام الدكيك، لي نجح يخلق منتخب قوي فاز بكأس إفريقيا للأمم ومشى لاكوب ديموند ثلاثة المرات.

هاد المدرب هو الوحيد في الجامعة لي مازال كيحقق نتائج، حتى الٱن وكيطمح باش يدي لقب اخر في كأس إفريقيا، لي غادي تنظمها العيون في يناير المقبل.

الدكيك خدام بالسكات بلا بهرجة بلا بوزات وبأقل أجر شهري، في الوقت الذي وحدين أخرين عندهم امتيازات وما دايرين حتا وزة.