عفراء علوي محمدي- كود//

كود تواصلات مع بعض المغاربة اللي مازال حاصلين فتركيا بعد ما تم تعليق الرحلات البحرية والجوية للمغرب بسبب فيروس كورونا، وواخا الجاو لحد الساعة تقريبا 330 واحد من تما ومازال غيجيو شي وحدين اليوم، إلا أنه كاين اللي ماتوصلش بلابيل دالقنصلية، ومجموعة منهم باقيين ممحنين وماعارفينش مصيرهم.

مغربية، فشهرها السادس ديال الحمل، تساءلات علاش ما عيطوش ليها “أنا بوحدي هنا وماعندي حد وماعرفتش آشنو ندير، درت طلب للسفارة وماعيطوليش، وماعرفتش واش غادي نبقى هنا حتى نولد، وفين غنول وشكون غيقابلني…”

وقالت فحديثها ل”كود” بللي كتعرف ناس خرين حتى هوما فوضعية صعبة  زاعيطوش ليهم لحد الآن “كاينين ناس كبار فايتين 70 عام، وكاينين أشخاص عندهم أمراض مزمنة ومناعتهم ضعيفة باش يقاومو فيروس كورونا المستجد، لكن كلشي مازال حاصل هنا”.

شاب آخر علق، فأحد المجموعات الخاصة بالمغاربة العالقين فالخارج، بللي المغاربة اللي مازال حاصلين فتركيا كيتعدو بالمئات “ومنهم اللي محتاجين يرجعو، ومنهم اللي مابقى عندو حتى ريال، وكاين اللي كان جا باش يتعالج على السرطان او يدير عملية وهاوا للآن باقي حاصل”.

وهذي أكثر من ثلاث أيام و”كود” كتحاول تتصل بالقنصل المغربي فاسطنبول، وراسلاتو فتطبيق واتساب وسولاتو على أحوال المغاربة اللي بقاو تماك، وشنو هي المعايير اللي تم اتخاذها فانتقاء اللي مشاو واللي غايمشيو فالرحلات الجاية، ولحد الساعة ماتوصلات بحتى شي جواب”.

ومن المرتقب يجي فوج جديد من المغاربة اللي حاصلين فتركيا اليوم الجمعة، وكاين حديث على رحلة أخرى غتكون يوم الأحد، واللي هي الأخيرة.