كود الرباط//

قال مصدر مقرب من رئيس الحكومة سعد الدين العثماني، في حديثه مع “كود” إن “الرأي اللي كيقول بلي طبع الفلوس وتوزيع البونات هو الحل فهاد الظرفية، ماشي رأي سليم والى طبق غايسبب كوارث”.

وأوضح ذات المصدر (خبير في المالية العمومية) ومقرب من العثماني لـ”كود” أن “رأي والي بنك المغرب معقول وكنقولها بناءا على تجربتي وخبرتي وقراءتي للوضع”. وهو الرأي لي كيقول بالتيسير وتخفيض سعر الفائدة وتوفير الاعتمادات”.

وتابع المصدر لـ”كود” :”أما كلام طبع الفلوس مشادش وغايزيد يعمق أزمة العجز التجاري”، مضيفا :”اما باش تجيب تجارب أخرى بحال بريطانيا باش تسقطها على المغرب فهادشي غير منطقي”.

وأوضح المصدر المقرب من العثماني أن “الاقتصاد البريطاني مختلف تماما عن الاقتصاد المغربي، بحيث أن البريطانيون كينتجو ويستهلكو محليا ومعندهم مشكل العملة الصعبة، إضافة إلى أنه عندهم بنك مركزي قوي يتجاوز قدرات بنك المغرب”.

وأردف المتحدث لـ”كود” :” الحل ديال طبيع الفلوس على برا وفبعض التجارب كان عبر البنوك المركزية لي شرات ديون الدولة وخففت على الدولة اما هنا فالمغرب بنك المغرب معندوش هاد القدرة وبالتالي طبيع الفلوس مستحيل وصعيب”.
وتابع “اليوم الدولة معندهاش موارد باش تستمر فالدعم لي كتقدمو للمقاولات والفئات الهشة، ومعولة على التضامن ديال المجتمع والتفاهمات والترضيات بين أرباب العمل والمستخدمين” يقول ذات المصدر.

يذكر أن عبد اللطيف الجواهري، والي بنك المغرب قال الاسبوع الماضي بأن الحكومة خاصها تزير السمطة وتحدد الاولويات فالانفاق، معتبرا أن الدعوات لطبع الفلوس غادي تلوح المغرب في الحفرة ديال التقويم الهيكلي وغادي يضر بالاحتياطي من العملة الصعبة.

الاقتصاد المغربي غادي اتراجع ب 5,2 بالمائة هاد العام بسباب كورونا والجفاف حسب بنك المغرب وهاد التراجع ماعمر المغرب شافو من 1996 ، وهادشي غادي انعاكس على عدد من المؤشرات منها معدل البطالة.

وهادي مشكلة كبيرة لأن في السنوات الماضية، البنك الدولي مثلا كايقول ان المغرب بحاجة لنمو سنوي ديال 7بالمائة باش اخدم هاد اللآلاف ديال المقبلين على سوق الشغل سنويا.

ولكن دبا البنك المركزي كايبشر أن النمو ف2021 اقدر اتحسن ويوصل 4,2 بالمائة.

ومن المتوقع، حسب بنك المغرب أن الصادرات تنخافض ب15 بالمائة، بالإضافة إلى مداخيل العملة الصعبة لي كايصيفتوها لمغاربة ديال الخاريج ب25 بالمائة بالاضافة الى انخفاض مداخيل السياحة والاستثمار الخارجي
المغرب دابا مقبل على كريدي دولي وغادي ايحاول اشوف مع صندوق النقد الدولي اجددو خط السيولة لي دخل فيه المغرب في أبريل باش ياخذ ثلاثة ملايير دولار امول بها الواردات ديالو.

الدين ديال الخزينة غادي ارتافع ل75 بالمائة من الناتج الداخلي الخام هاد العام.