كود علي الصافي العيون ///
مجيدري محمد سالم مول هاد القهوة والعمارة اللي فيها مقرات مؤسسات تابعة للدولة واللي ناس كلميم قالو باللي كيدخل منها اكثر من 50 مليون سنتيم ولى متخصص فالسكن الاقتصادي٬ قاليك باغي يبني 3 الاف شقة اقتصادية ولمن للجيش.
“كود” سولات اكبر شركات العقار المتخصصة فالسكن الاقتصادي او فالعقار بصفة عامة٬ ماشي غير ما كيعرفوش شي حد اسمو مجيدري بل حتى هاد المشروع اللي قال باللي فيه 3 الاف شقة فكلميم للعسكر “ما يمكنش يكون بلا ما نعرفوه. الجيش راها مؤسسة منظمة وهاد الصفقات كتكون فيها اعلان باش كاع الشركات كيعرف وياخدو المزيان فالمارشي”. مالك مجموعة عقارية اخر قال ل”كود” باللي هاد الشي ديال 3 الاف شقة اقتصادية يقدر يبنيوهم الجيش حقاش القوات المسلحة الملكية عندها شركة للعقار. بنات شقق بحال كازا. علاش غادية تمشي عند مقاول نكرة”.
غير هو فبلادنا كلشي ممكن. الجيش دابا اللي خاصو يخرج ببيان يشرح علاقتو بهاد السيد. باينة عندو ركيزة صحيحة لدرجة انو ترامى على الملك العام ورفض انذار المجلس البلدي لكلميم.
الانذار اللي جا لمول اقامة الهودج باش يخبرو باللي محتل الملك العمومي فقهوة اسمها الهودج. هاد الانذار واخا قالو ليه غاديين نهدمو ليك وبالقانون رفض يهدم. الرسالة جاتو نهار 3 شتنبر ومازال ما حيد والو.
