كود احمد الطيب الرباط ///

عبد الاله بنكيران رئيس الحكومة السابق الامين العام لحزب العدالة والتنمية السابق غادي ويبعد على الحزب. كيفقد فيه مواقع. كيسهل الخدمة باش امثال بنعرفة يبقاو متحكمين فيه. خرجتو فقضية لغة التدريس يمكن قوات شعبيتو امام محافظي الحزب وعينة من السكة القديمة من السياسيين فالمغرب٬ غير هي ضعفاتو قدام قواعد كثيرة فحزبو وطبعا لمغاربة اللي ما مسوقينش لهدرتو وباغيين يقريو ولادهم بالفرنسية. راهم كيقريوهم اليوم وما تسناوش حتى يجي هاد القانون اللي صوت عليه مجلسي النواب والمستشارين والخاص باصلاح التعليم.

بنكيران بعد ما خسر معركة وما داها فيه حد فحزبو باستثناء متطرف بحال المقرئ ابو زيد٬ ناض كيدعو لجبهة ضد “فرنسة التعليم”. معركة خاسرة من اللول. المشكلة ماشي فالفرنسة ولا الاتجلزة ولا غيرها. لمغاربة باغيين تعليم مزيان.

محرك بنكيران هاد المرة محافظ جدا. محافظ على المغرب اللي كان كيبان كيفهمو مزيان.
كيفاش سياسي عفريت بحال بنكيران عندو قدرة كبيرة على قراءة الاحداث وعلى التصرف وفق هاد الاحداث بسرعة تسالي بيه السياسة مع امثال الاستقلالي امحمد خليفة ومع هاداك اللي ما معروفش واش يساري ولا اسلامي عبد الصمد بلكبير وخصوصا مع العدلة والاحسان اللي انضمت لهاد الجوقة.

بنكيران ديما ضد العدل والاحسان ضد تفكيرها ضد علاقتها بالسلطة ودابا ولى متحالف معاها. هادي فيها انتهازية سياسية كبيرة. سبهم وواجههم وانتقدهم ودابا معاهم. ما شاداش

هاد التخربيق ديال التصدي لقانون داز فالبرلمان من قبل بنكيران كيتعارض مع اللي كان كيدافع عليه باش كان رئيس حكومة.
داخت ببنكيران الحلوفة باش ولى كيحركو نوع من الانتقام. الانتقام من قانون كان خاصو يدوز باش كان رئيس حكومة وتم تغيير بعض نصوصه وخلاوه حتى مشى وداز مع صحابو. المخزن طلع معلم وبنكيران بغى ينتاقم ناض يواجه.

خرجتو الاولى بينات على الجانب المحافظ لكبير فيه. جانب قرب للتطرف. دابا مشى فخطوات متطرفة. طاح وهو السياسي الذكي فشبكة ديال وحدين ما عمرهم طفروه فالسياسة. ولى بنكيران بحال عبد الصمد بلكبير وامحمد خليفة. لمغاربة كانو كيبان ليهم كيشبهم فتناقضاتهم فكلامهم فثقافتهم فتحررهم فمحافظتهم. دابا ولى كيبان ليهم مشرقي ماشي هاداك المغربي اللي بحالهم.

اختار الجيهة اللي ديما كانت خاسرة. اش وقع ليه وفين غادي يوصل بهاد الطريق. هاد الشي غادي يبان قريب. اما هاد الجبهة فهي اكبر تخربيقة طاح فيها هاد الوحش السياسي