سهام البارودي – كود//
هادي هي آش خاصك آ العريان ! خاصني شي ظلامي تاهوا يحل فمو و يزيد يكمل عليا بفهامتو العوجة آ مولاي
العالم مقلوب بوباء كورونا و فالمغرب الناس حاطة يديها على قلوبها و كاتسنى تشوف كل نهار عدد الاصابات و الوفيات و الحالات لي تشافات ! الناس خايفة على حياة المواطنين لي مهددة و على الاقتصاد لي دخل فخسائر كبيرة كاتهدد بانهيار اقتصادات عالمية و ربما العالم لي داير بينا كلو يتبدل من هنا لقدام …. ووسط هاد الروينة كاملة ! شكون غايخرج لينا بتصريح مؤخرا باش يزيد الخل على الخلول ! سي حسن الكتاني واحد من الاسماء لي عرفتهم انا شخصيا فسطاش ماي و لي تحكم عليه بعشرين عام ديال الحبس!
هاد السيد و لي متفرغ مع راساتو لللايفات فالفايسبوك و نشر الافكار المتطرفة ! مؤخرا خرج بفيديو كايقول فيه بلي السبب فانتشار فيروس كورونا هوا انتشار المثلية و الزنا بين الناس ! يعني هاد السيد لي ماعندو تاشي ديبلوم فالبيولوجيا و لا الطب و لا الوبائيات قدر يحدد لينا سبب ظهور فيروس لي محمق البشرية ! شوف الزعامة فين واصلة
الخطير فالهضرة ديال الكتاني و فالربط لي كايدير بين الوباء و بين ظاهرة فحال المثلية انه بهاد الهضرة كايساهم فنشر مشاعر الكراهية اتجاه واحد الفئة لي هي اصلا معرضة للاضطهاد ! و كايألب عليهم عباد الله ! و مع هاد الظروف لي كاندوزو منها شوف كيفاش هاد الهضرة تقدر تتأول و اشنو تقدر تأدي و هادشي راه خطير بزاف !
واش هاد السيد عندو شي عقل و لا ماعندوش ؟! واش ماعارفش انه فحال هاد الهضرة راه هي لي سيفطات عباد الله تتفرگع فسطاش ماي حيت لي شارجاوهم قالو ليهم بلي الفحش و الفجور لي كاين فاوطيل فرح و فكاسا دي ايسبانيا راه كايجيب غضب الله ؟ و بلي خاصهم يجاهدو ضدو !
واش مافراسوش بلي غدا يقدر ينوض شي حمق يرتاكب شي جريمة ضد شي مثلي حيت سمع بلي المثلية هي سبب كورونا ؟!
هادشي راه خطير و هاد الناس خاص لي يوقفهم عند حدهم خصوصا فهاد الفترة الحرجة لي البلاد محتاجة فيها لتضامن گاع الفئات باختلاف مشاربهم السياسية و الايدييولوجية و الخرزية تاهي ! ماشي لنشر التفرقة و الكراهية
