عفراء علوي محمدي- كود//

أكد مستشار مكلف بالتواصل مع الصحافة ل”كود” صحة الخبر اللي كيروج بخصوص الصفقة اللي دارها المغرب مع كوريا الجنوبية لاقتناء مجموعة من الأجهزة الخاصة بالتشخيص والكشف على فيروس “كورونا” المستجد، واللي تنشر فمواقع كورية قبل ماتنقلو مواقع محلية.

وقال المستشار، فحديثو مع “كود”، بللي الندوة اللي غاتدار اليوم مع الستة غادي تجاوب فيها الوزارة على الأسئلة الشائعة اللي كتروج بشأن الوضعية الوبائية فالمغرب، وغتتكلم فيها الوزارة كذلك على معطيات أوفر بخصوص هذ الأجهزة اللي كتقوم بالكشف على الفيروس بشكل سريع، بمعنى فظرف ساعتين فقط أو أقل.

وكيقول المستشار، فتصريحو ل”كود” دائما، بللي المستشفيات ومراكز الفحصات المعتمدة كتستقبل فهذ الأيام مجموعة من الأجهزة الأخرى، من غير هذ الأجهزة الكورية، ومجملها كيتصنع هنا فالمغرب من طرف شركات كتدير معدات طبية متطورة ومبتكرة.

وللإشارة، علنات موقع إخبارية كورية بللي سفير المغرب فكوريا الجنوبية وقع عقد مع مدير شركة “أوسنكَ هيلث كير”، باش يشري المغرب 100 ألف جهاز ديال الكشف السريع على فيروس “كورونا”، بالإضافة ل10 آلاف جهاز كشف مجاني آخر.

الأجهزة غادي تكون مخصصة للكشف على الفيروس بشكل سريع على المعتاد، باش يتخفف الضغط على المختبرات اللي كتدير هذ التحاليل فالمغرب، وكيتعلق الأمر أساسا بمختبر باستور فكازا، والمعهد الوطني للصحة فالرباط.

والحالة الوبائية فالمغرب عرفات تطور كبير، إجمالي عدد الإصابات لحد الساعة هو 450 إصابة، منها 26 وفاة، و13 لحالة تشافات.