أسماء غربي – كود//

نشر مسؤول التواصل بوزارة الصحة حفيظ الزاهري، شائعة قدها قد الخلا وكولها كذوب وفايك نيوز، كتقول بلي المغرب هو البلد الأول من حيث الاجراءات الجدية لي دار لمواجهة كورونا، (حسب الصورة اسفله)، كاتبين الجهل ديال هاد المسؤول بعالم الاعلام والصحافة.

هاد المسؤول لي مبقاش عندو تا شي دور ف التواصل، منذ قرار اعتماد محمد اليوبي، مدير مديرية الأوبئة، المتحدث الرسمي حول الحالة الوبائية بالمغرب، ناض كينشر الفايك نيوز.

التدوينة لي دازت عليها كثر من 10 دقايق وناضو ناس شافوها ونقلوها وكاين لي بارطاجا تدوينة، دبا مسحها بلا ميعتذر.

الزاهري لي جابو خالد ايت الطالب، وزير الصحة، يكون مكلف التواصل، فشل فمهمتو، ومكيتجاوبش مع الصحافيين.
وتشكاو منو الصحافة الدولية والوطنية، حيث ماشي ديال التواصل ومعندو علاقة بالاعلام، من غير تسنطيحة.
كيفاش بحال هذا يكون مسؤول التواصل. فضيحة كتزاد على فضيحة ضعف التواصل الحكومي.