كود-مراكش//

بعد تدشين الملك لمستعجلات القرب الملاح في مراكش،هاد الاخير عرف خصاص من ناحية الاطباء العاملين حيث اللي جابو وقت التدشين كانو فقط من اجل الصور و اخفاء الخصاص على الملك.. و لسد هاد  الفراغ مندوب الصحة ف مراكش مشا كلف طلبة كلية الطب ف السنة السابعة بالعمل فيه..

مصادر طلابية قالت لكود ان اللي دار المندوب مجرد ترقيع، حيث خصو يديرو مباراة و يوظف الاطباء ..ماشي يكلف الطلبة حيث  قانونيا الطلبة كايديرو غير تكوين وماشي من حقهم يخدمو بوحدهم دون اشراف طبيب.. والحل اللي لقا المندوب هو انه  دار راسو هو غادي يشرف بشكل يومي على عمل هاد الطلبة وهو شيء مستحيل طبعا وباينة الاشراف غادي يكون غير شكلي..يعني بغا يصيفط الطلبة يخدمو بوحدهم تما بدون اشراف ولا تغطية او حماية  قانونية ف حالة التهجمات خصوصا وانها  خدمة مستعجلات  مستمرة اربع و عشرين ساعة ..

في بلاغ لمكتب الطلبة توصلت كود بنسخة منه، الطلبة المعنيون دكرو بحالات كثيرة كايكونو فيها هما الضحية حيث ماشي  محميين قانونيا ..زيد عليها ان هاد التكليف  ماملائمش لتكوين الطلبة حيث خصهم يديرو امور اخرى من غير المتسعجلات كل ساعة بالاضافة الى ان مصادرنا قالت ان المندوب هدد الطلبة بلي ماغاديش ينجحو الا مادروش هاد المدوامة.

مكتب الطلبة قال انه غادي يلجأ لاشكال نضالية باش يوقف هاد التكليف مستقبلا.