عفراء علوي محمدي- كود//
اعتبرات خلود المختاري، مرات الصحافي المعتقل سليمان الريسوني، أن السلوك اللي دارتو المندوبية العامة لإدارة السجون وإعادة الإدماج سلوك، بتسريب فيديوهات لراجلها، ماشي اخلاقي، وأنها كتحمل فيه المسؤولية الكاملة.
وزادت المختاري، فتصريحها ل”كود”، أن الكاميرات دارت لتأمين حياة السجناء وماشي للتجسس عليهم.
وكشفات أن الفيديوهات قديمة، حيت آخر مرة شافتو كان فحالة أسوأ بكثير، و”هذوك الفيديوهات كدينهم حتى لو كانت قديم، حيت كيبان كان فحالة صعيبة”، حسب ما قالت.
وزادت: “الله يعطيهم الذل.. هذشي كيضر فالقلب”.
وكشفات انها غتابع المندوبية على هذشي اللي دارت، وان فهذشي إخفاء للحقيقة ديال فين كاين الريسوني دابا، حيت جات السيمانة الجاية باش تزورو فالحبس هي وولدو ودفاعو وقالو ليها أنه رفض، “المندوبية توري حقيقة الحالة الصحية لسليمان، وهذشي علاش ماجابوهش للحكم ديالو، وخا تم الأمر بإحضارو بالقوة العمومية”، كتقول المختاري.
ونشرات المندوبية العامة لإدارة السجون وإعادة الإدماج، اليوم الاثنين، فيديو للصحافي المعتقل سليمان الريسوني، للرد على بيان صدرو الإتلاف المغربي لهيآت حقوق الإنسان.
والفيديو كيبان فيه الريسوني كيبدل حوايجو وكلس فكرسي وموجد حداه السطولة باش يدوش فكولوار فالحبس، الفيديو الثاني كيبان غادي كيتمشى بعكاز، وكيبان الريسوني ضعيف بزاف بالمقارنة مع كيف كان قبل.
وفبلاغها تعليقا على الفيديو، قالت إدارة السجون ان الريسوني كياخد العسل باستمرار، وألح مؤخرا باش تعطى ليه زيت الزيتون، وتم الإخبارها بانه كياخد الشربة والمقويات والتمر، ومواد غذائية بحال الفواكه.