وكالات //

طلب تلميذ كايقرا فليسي فولاية أوهايو الميريكانية (Canton McKinley High School) بتعويض القيمة ديالو 10 مليون دولار بعدما بزز عليه المدرب ديالو ياكل پيتزا پپروني (Pepperoni Pizza) لأنه منك وماجاش يتريني.

الفاميلة ديال الدري الضحية، حطات دعوى فالمحكمة ضد “Marcus Wattley” (المدرب) حيت الولد ماكايكلش أصلا لحم الخنزير بسباب المعتقدات الدينية العبرية اللي تربي عليها وسط عائلتو.

المدرب ديال الفوت فالليسي، بزز على الدري ياكل الپپروني، اللي هو نوع من “سلامي” (Salami) فيه لحم مجفف ديال الحلوف مخلط مع البكَري، بززو عليه 10 ديال المرات والدري كان فكل مرة كيرفض، ومع ذلك بقى عليه لونترينور حتى وكلها ليه فوكَ خاطرو وهددو إيلا ماكلاش غادي يجري عليه من الفرقة. هاد القصة وقعات فشهر ماي 2021 قبل ما توصل لافير للقضاء.

من بعد هاد الواقعة جراو المسؤولين على المدرب ولكن الدري نت فوق هادشي مازال متشبت بالحصول على تعويض مالي لأن صحابو ولاو كيطنزو عليه وتضر نفسيا بزاف من بعد هاد الحادثة.

وها فيديوهات على بداية القصة وكفاش حكَر لونترنور على التلميذ ديالو قدام صحابو، وفيديو آخر على كيفاش وصلات القضية هاد ليام للمحكمة: