وكالات //

سدات شركة “دومينوز بيتزا” (Domino’s Pizza) الميريكانية آخر فروعها فالطاليان من بعد 7 سنين فقط باش دخلات للسوق الإيطالية، وهادشي لأنها فشلات باش تنافس البيتزا ديال الطاليان المشهورة، وديكلارات فاييت فالبلاد.

وكالة “بلومبركَ” قالت أن شركة “دومينوز بيتزا” سالات عام 2020 بمشاكل مالية وكريديات وصلات حتى ل10.6 مليون يدأورو، بسباب أنها دخلات أنواع جديدة من البيتزا بحال “بيتزا بركَر بالفروماج”، أو “بيتزا الأناناس”، أو “بيتزا دجاج باربيكيو” وما صدقوش ليها، والناس تما مامسوقينش للأنواع ديال البيتزا اللي رايجة فميريكان، وبالتالي الشركة فشلات فحملتها الإشهارية والتسويقية مع الطليانيين واضطرات “تهبط الريدو” فبلاد البيتزا.

“دومينوز بيتزا” الميريكانية كانت بغات تنافس المحلات ديال البيتزا التقليدية فالطاليان، لكن هاد الأخيرة قدرات أنها تصمد وطورات الخدمة ديالها، وزادت خدمات فالموني ديالها، بحال الليڤريزون فابور، واللي عاونها تحقق أرباح كبيرة فأيام أزمة جايحة كورونا.