سهام البارودي- كود//
كايضحكوني دوك لي كايكتبو بلي عدد الحالات في ارتفاع و كايقولوها و هوما مستغربين ! علاه شنو كنتو كاتساينو بالسلامة و العافية ؟! أنه المغربي من دايتو لراسو بداك النيڤو د الوعي لي عندو تبارك الله و داك النيڤو ديال المسؤولية غادي يحمي راسو و يبقا يدير الكمامة و يحافظ على مسافة الأمان طبعا لا ! بنادم فالعز ديال كورونا و كان ماكايديرش الكمامة ! عاد لاقلتي ليه راه حگا و الواد العدد انخفظ و ممكن انك تخرج و تسافر دابا غانخففوا عليك الاجراءات !
المستوى ديال الوعي د عباد الله و انعدام المسؤولية الفردية ماكاتعطيكش انسان تقدر طلقو و يحتارم الاجراءات الوقائية راسو ! بلا مايخاف من بوليسي بلا مايحضيه مخزني بلا مايخاف من شي بروصي ! للاسف مازال بزاف ديال المغاربة كايحركهم الخوف ! كايخاف من الجوع كاينوض يخدم ! كايخاف من باه و مو كايمشي يقرا ! كاتخاف من خوها كادخل لدارهم بكري ! كايخاف من مو كايطلق مرتو ! كايخاف من البوليسي ديال المرور كايحتارم السطوب و الضو الاحمر ! كايخاف من البروصي كايدير السمطة ! أما لاجات عليه هوا بوحدو ! ناضت شي نهار الدولة و قالت ليك هاد السيمانة غانخليوكم تعيشو بلا بوليس بلا مخازنية بلا جوندارم و الله تايبان ليك بنادم غادي فسونس آنتيردي وسط ميات طوموبيل و بلا سمطة ! الفوضى غادي تنوض و غاتشوف شي تهيميج ماعمرك شفتيه ! و هادشي لي واقع دابا مع كورونا ! بنادم غي سمع تخفيف الاجراءات ناض كايجري لاح الماسك فالزبل و خرج كايتعانق مع عباد الله ! ماسوقوش هوا لا ففيروس ! لا فتونس ! لا فالسلالة الجديدة … راه هاز فوطتو و كايدور فالسعيدية لي تلاقاه كايسلم عليه بربعة د البوسات !
و دابا الدولة خاصها توجد راسها و تسنط للدقة لي جاية مورا الصيف و لي البوادر ديالها بدات كاتبان من دابا ! للأسف لي حرثو الجمل غايدكو !
