وكالات //
شركة “نتفليكس” العالمية دارت إنتاج لأول فيلم عربي بعنوان “أصحاب ولا أعز”، اللي البطلة ديالو منى زكي، وهو فالأصل “اقتباس” من فيلم طالياني وكاينة حتى النسخة الفرانساوية والميريكانية.
غالبية العرب كيف العادة ماعجبهمش كيفاش الممثلين دواو على الخيانة والغدر والمثلية الجنسية، وهاجمو الحيط القصير اللي هوما الممثلين وماخلاو فيهم غير اللي نساو.
المعلقين قالو أن الفيلم ماكيمثلش “المجتمع العربي” وخارج على قيمه لا في اللغة المستعملة ولا اللقطات ولا المشاهد.
ومن غير المنتقدين، كاين اللي أكدو أن كَاع داكشي اللي جا فالفيلم هو فالحقيقة كاين فالواقع ديال هاد المجتمعات، غير النفاق الاجتماعي ديال الناس كيخليه يبقى “مستور” ومقموع بحالا ما كاين والو.
أشخاص كثار لقاو فرصة فهاد الإنتاج باش يعاودو يبانو بنشر الكلاخ ديالهم ضد فيلم يقدر يعجب هذا وما يعجبش لاخور لكن الانتقاد من المفروض يبقى على أسس فنية فقط، وماشي بأفكار داعشية اللي كتكفر كلشي وكتحرم كلشي.
