الرئيسية > آش واقع > مازال الشيكات المكتوبة بالأمازيغية ممنوعة فالبنكات
28/09/2020 18:30 آش واقع

مازال الشيكات المكتوبة بالأمازيغية ممنوعة فالبنكات

مازال الشيكات المكتوبة بالأمازيغية ممنوعة فالبنكات

كود كازا//

علاش الحكم اللي أمر بصرف الشيك ممكتوبش بالأمازيغية وعلاش مازال هاد اللغة متيتعاملش بها الإدارات

العديد من الأمازيغ، صفقوا للقضية اللي رفعها المحامي أحمد أرحموش، ضد بنك مصرف المغرب ديال كازا، وبزاف ديال الناس، ولاو تيسحابو راه المحكمة لزمات البنك باش يصرف أي شيك محرر بالأمازيغية، اللي تينص الدستور على أنها لغة رسمية في المملكة المغربية، لا ألخوت، هذا تغليط للرأي العام. حقيقة كاين حكم في الموضوع صحيح تيأمر المحكمة باش تصرف الشيك، ولكن أجيو تشوفو معايا واش تصرف حيت مكتوب بالأمازيغية ولا حيت مكتوب العربية، ولا حيت الحكم بزز عليهم يصرفوه.

كلنا تنعرفو أن الشيك وسيلة أداء وليست وسيلة ائتمان، يعني تيتصرف بمجرد تحريره، وخا تدير فيه بلي بغيتي يتصرف في 2030، والشيك لقدمو المحامي أرحموش، ملي رفضاتو البنكة في 9 يناير 2020، تحط فالمحكمة التجارية في 27 من الشهر نفسه، وبقا في المناقشة والمساطر حتى لتاريخ 17 شتنبر 2020، أي قبل اسبوع تقريبا عاد تصرف يعني أكثر من سبعا ديال الشهور، وموت نتا عاد يصدر حكم، ومازال إلى كان شي استئناف يتعطل عام آخر، ويقدر يوصل للنقض، حيث هوا حكم مشمولش يالنفاذ المعجل.

نقولو كاع البنك غادي يصرفو بالحكم الابتدائي تجاوزا باش يغلق الباب، ومايخادوش عليه الأمازيغ صورة خايبة تقدر تأثر في السمعة ديالو ولا يقاطعوه ولا شي حاجة بحال هاكا.

دابا بغينا نعرفو واش إلى كتب شي واحد آخر شيك بالأمازيغية غادي تصرفو البنكا، أوهو، أوهو، ما يمكنش، خاص حكم، والحكم يكون مكتوب بالعربية ولا بالفرنسية، تيترجم داكشي لي في الشيك، إذن إلى بغيتي تكتب شيك بالأمازيغية خاصك توجد محامي وأتعاب محامي وتسنى سبع شهر على الأقل باش تصرفو.

راه البنك اللي رفض يصرف الشليك باقي رافض، تجيب شيك خر يرفضو، ودابا إلى صرف الشيك موضوع الحكم، فراه ركز على نص الحكم اللي مكتوب بالعربية، أي نفذ ما هو مدون بالعربية، واشنو جا في الحكم. جاء فيه اسيدي صرف الشيك رقم كذا الحامل لمبلغ 3000 درهم لفائدة فلان بن فلان، يعني حدد كلشي، المبلغ ورقم الشيك واسم المستفيد، والتنفيذ انصب على الحكم ماشي على الشيك.

دابا كون كانت الأمازيغية لغة رسمية كيف هو فالدستور، كون تحرر الحكم بالأمازيغية، ويجي مأمور التنفيذ حتى هو تيعرف الأمازيغية، وينفذو على البنكة، ديك الساعة نقولو انتصار اللغة الأمازيغية، أما ما وقع فلا علاقة له بالأمازيغية والدفاع عن الأمازيغية، طالما الجلسات كانت بالعربية والتحرير حتى هوا بالعربية.

القضية صعيبة ومعقدة، وخاصها بزاف ديال المجهودات، واللي أولها نعرفوا الأسباب اللي خلات الأمازيغية متنتاشرش في الإدارات كلغة دالتعامل والمراسلة، واش حرف تيفيناغ اللي صعيب، واش منقدروش نبدوه بحرف عربي أو لاتيني، اللي معروفين ونخليو حتى يتعلم الواحد عاد يطالع على تيفيناغ، أولا واش ضعف طريقة التلقين، واش تهاون القائمين على هاد الورش، حيث الأمازيغية مبقاتش تدور فالتعليم منذ مدة وكاع ديك الهضرة اللي رافقات إدراجها في مقررات التربية مشات خلا.

موضوعات أخرى

29/03/2024 14:10

ها المعقول..استثمار صيني كبير فالمغرب بـ3 مليار درهم لانتاج بطاريات السيارات الكهربائية غايوفر 2500 منصب شغل وبلادنا هربات على لالجيري فصناعة السيارات

29/03/2024 14:00

الدريب لـ گود: الناصيري عطى لكثير للوداد وهادي صفحة وطويناها ودابا حقبة جديدة برئاسة البرناكي وغنخدمو لإرضاء الوداديين

29/03/2024 13:30

الجيش الإسباني غاد يوسع المنشأت العسكرية ف سبتة ومليلية وغيجهز مراكز خاصة للتدريبات والمناورات لسلاح المدرعات

29/03/2024 13:00

تفاصيل حصرية على وضع منسقة جهوية لحزب سياسي بجهة فاس مكناس فالحراسة النظرية: خدات من الضحايا فلوس صحيحة وصلات 18 مليون والمدير الجهوي ديال الضرائب هو اللي فضحها

29/03/2024 12:30

وضع المنسقة الجهوية لحزب سياسي بجهة فاس مكناس فالحراسة النظرية بسبب قضية كبيرة ديال النصب والاحتيال والتزوير

29/03/2024 11:30

السلطات المغربية قبلات العودة ديالهم.. گاع الحراگة اللي استغلو الموڤيطا ديال الثلاثاء الفايت وحرگو لسبتة رجعو