محمد سقراط-كود///

المغرب مقارنة بدول أخرى حسن منو بزاف فالبنية التحتية والخدمات راه غالي وبزاف هادي مايشكك فيها تاحد، ولكن لي ممفهومش هو هاد الموجة ديال السلوكات الشعبوية لي كتدغدغ الجموع المتذمرة، بنادم كيدخل لمطعم أو قهوة او أوطيل وكيشد لاكارط ويشوف شنو بغا والثمن مكتوب ويطلبو ويتصور معاه ويحطها فإنستغرام تحت منها عرام ديال الهاشتاغات ديال السعادة والعياقة والفوحان، وفاللخر ملي يخلص يصور لاديسيون ويحطها ففايسبوك ويتشكى من لغلا والشفارة والنصب، إنستاغرام ديال السعادة وفايسبوك ديال البكا والشكا والنضال، حقا الأثمنة مبالغ فيها نوعا ما، ولكن آشنو معنيتها أنك بكامل قواك العقلية طلبتي داكشي وعارف ثمنو شحال وملي خلصتيه جيتي تبكي وتشكى فالفايس.

مادام أن الواحد دخل لبلاصة بحال هاديك وطلب داك الماكلة أو المشروبات إذن راه غادين مع القدرات الشرائية ديالو حيت مابزز عليه حد ماداه حد صحة، وملي هاد الناس ديال فايسبوك كولشي كيتشكى من الغلاء والنصب ومنعرف شنو، إذن شكون هاد الناس لي معمرين هاد القهاوي الغاليين والمطاعم ولوطيلات، راه داكشي غالي على فئة ورخيص بالنسبة لفئة خرى ديال المغاربة، وفالعالم كامل راه كل واحد لإينا طبقة موجه المنتوج ديالو، ومن خلال الثمن وشنو كيقدم راه باين شكون كيستهدف، وكيف مكاين إستنكار وإستغراب لبعض الأثمنة لي بانت فالفايسبوك، كتلقى ناس خريين كيدافعو على غلاء دوك الاماكن حيت بالنسبة ليهم الثمن المناسب كيعني تواجد الفئات الشعبية بما تحمله وتمثله من سلوكات غير حضارية فيها الكثير من قلة الترابي( علما أن الأمر في المغرب ماشي حكر على طبقة معينة غير هو حقا يظهر فيها أكثر).

دابا متافقين على أن بزاف ديال المغاربة كيفضلوا يمشيو لبلايص غاليين غير على ود العزلة ديال البشري، باش يبعدو على بوحزوق وصداعهم ، ولكن فنفس الوقت ملي كنشوفوا أسرة محدوجة الدخل غادين للبحر أو مفرشين فالكازو وجايبين البوطة والكوكوط كتصفر، كيبدى بنادم ينتاقد فيهم وشوفو كي ردو لينا الكورنيش شوفو كي ردو لينى المغرب، علما أن داك بنادم هو لي حريص فاليومي ديالو أنه مايتخلطش معاهم ومستاعد يدفع الفلوس غير باش مايكونش هو وياهم فبلاصة وحدة، وهاكة دايرين شلا بلايصن إذن هاد الأسر المحدودة الدخل راه مابقا ليها فين تمشي من غير الكازو والجرادي والبحورةن راها محاصرة إقتصاديا وإجتماعيا ومع ذلك كنتسناو منهم ميتصرفوش بعدوانية وإستهثار مع الملك العام، راه تاواحد مكره يعيش اللوكس.