نجوى المالحي-كود//

المؤثرة فاطمة المعزي لي مشهورة بأم مهاب كتعنف ولدها وتعايرو وضربو وكتعاملو بطريقة خايبة بزاف وهادشي كيكون مباشر ملي كتكون دايرة لايف في انستكرام.

هاد السيدة قضيتها تفضحات كثر بعدما دارت لايف كتهدد فيه جدارمي بالشوهة، وختها بغات تنتحر بزيزوار وطيح عليه الباطل.

نفس النهار قبل ما يخرج لايف الجدارمي، دارت فيديو في الصباح كيتسمع صوت ولدها كيغوت حلاقمو غادي يخرجو وقالت بلا حشمة بلا حيا أنها رابطاه حيت فيه الصداع.

وقالت أم مهاب “ولدي مربوط من يدو ورجليه باش يتكالما، وهادي تربية ديال ماما، هي لي رابطاه، وكبرنا بهاد الطريقة وطلعنا مربيين”. ولأنها معندهاش الكبدة على ولدها قالت فاللايف “مالكم شديتو في موضوع “مهاب” دويو في المايكاب ونساوه عليكم”.

طريقة تعاملها خلات الناس بزاف ينتاقدوها ويلوموها لأنها مخلية ولدها كيغوت وعوض تقابلو دايرة لايف ديال كيفاش كتصوب الماكياج.

الممثلة لبنى أبيضار دارت البارح تدوينة فالكونط ديالها الشخصي على فيسبوك، كتبات فيها “شي وحدة سميتها أم مهاب كتبيع لقولبات دالغلض باش تطلع المشاهدات لبارح ربطات ولدها وعنفاتوا باش يطلع معها فلايف…كنقول ليها من هاد المنبر.. كون كنتي حديا او نعرف فين نلقاك بربي حتى نعاود ليك التربية المكلخة انتي بزاف عليك الأمومة.. انتي عار على الإنسانية.. ناري وتعرفي شحال سممتيني وعصبتيني الله ياخد حق داك الطفل البرئ منك لحيونات مع ولادهم ميدروهاش.. سمي راسك أم كلاخ ولى أمنا الغولة احسن’.