كود – وكالات //

كشفات دراسة أن ببغاوات الـ”كوكاتو” (Cockatoo) البرية تعلمات أساليب جديدة فالحياة، لكن من بين هذ الأساليب واحد الطريقة تسببات فإحداث مشكلة فأستراليا.

وولات ببغاوات الـ”كوكاتو” البرية فأستراليا كاتعرف تحل الغطايات ديال طاروات الزبل، وتقلب فيهم، وتسرق منهم الماكلة، هادشي تطور عندهم ونتاقل لمناطق أخرى.

ورصدو المواطنون واحد الطير فواحد من الأحياء، اللي كان اخترع طريقة جديدة باش يحل غطايات ديال الطاروات، قبل ما تنتاشر هاد الطريقة عند جميع طيور الكوكاتو فالضواحي القريبة، وبدات كتوسع، الشي اللي خلا العلماء يستغربو.

ونشرات مجلة “Science” العلمية بحث هضرات فيه على هاد الظاهرة، وكانت أكدات نتائج البحث أن الببغاوات تعلمات من بعضياتها.

وقالت الباحثة الرئيسية فالدراسة، من معهد “ماكس بلانك” لسلوك الحيوان في “رادولفزيل” بألمانيا، باربرا كلامب: “لاحظنا أن الطيور ماكاتحلش طاروات الزبل بنفس الطريقة ولكن كاتخدم تقنيات فتح مختلفة فمناطق مختلفة، وهذا كايعني أنهم اكتاسبو هاد السلوك من خلال المراقبة”.

وقال الباحثون أن طيور الـ”كوكاتو” (من نوع Cacatua galerita) اللي كاتعيش شرق أستراليا، هي ببغاوات عندها أدمغة كبيرة وطويلة العمر، وكاتعيش حياة اجتماعية جيدة وفريدة.