الوالي الزاز -كود- العيون ////

[email protected]

فوزي لقجع رئيس الجامعة الملكية المغربية لكرة القدم خدام بمنطق الدق والسكات والدقة بأهداف لا تعد ولاتحصى فتيران صعيب بزاف ويكفي ان إسمو إفريقيا وارتباط هاد التيران بالقضية الوطنية والوحدة الترابية.

فوزي لقجع جاب حدث إفريقي تاريخي للعيون على عين اللوبي الجزائري الجنوب إفريقي فالإتحاد الإفريقي لكرة القدم، وجسّد الوحدة الترابية للمغرب على ترابو الوطني كلو وهادشي شهدات بيه حتى الفيفا لي دارت بالبند العريض “العيون المغربية”، والأكثر من ذلك جاب دول عندها صيت وباع فمعاداة الوحدة الترابية للمملكة بحال الموزمبيق وأنغولا وشاركو على أرض المغرب بكل فرح.

كاين فرق كبير بين فوزي لقجع وناصر بوريطة لي خدمتو هي هادي. خدمتو يروج للمغرب ويدافع على الوحدة الترابية للمملكة، هاد الفرق شاسع وكبير وجاب نتائج خلات صدى دولي اعترافا بمغربية الصحرا بعيد على ديك البهرجة الخاوية لي دّارت هاد شهرين من طرف وزارة الخارجية. اييه دارت مجهود فعلا وجابت دول افتتاحات قنصلياتها فالعيون والداخلة ولكن ما عرفاتش كيفاش تصرف هاد الإنجازات وميعاتها بسباب التسرع ودارت البيض كلو فسلة واحد. بحال هاد الخطوات خاص تكون مدروسة ونعرفو وقتاش نلعبو ورقة ونطرحوها على الطاولة وبدل ما نحل اربع قنصليات فشهر واحد مثلا نحل اربع قنصليات فأربع شهور ونضمن سيرورة تجسيد الوحدة الترابية لأربع اشهر من أصل سنة كاملة تجددات بموجبها ولاية المينورسو حتى لأكتوبر 2020.

خاص الدق والسكات بخطوات فعلية تنفعنا وما يكونش عندها آثار جانبية فحالة لي دار بوريطة لي غادي يكون حاضر فالقمة الإفريقية المقبلة ففبراير وغادي يوجه كل المعادين للوحدة الترابية لأنهم يهاجمونا ويتكتلو ضد السيادة الوطنية خصوصا وأن جنوب إفريقيا غادي ترأس الإتحاد الإفريقي.

بوريطة مادارش لي خصو يدار وحاول ينسب لراسو منجزات اكبر منو فغضون شهر واحد وخلاف ذلك فوزي لقجع خدم فسكات وتقدم بينا خطوات للأمام فجال اشتغالو لي هو كرة القدم أفيون الشعوب ولغتهم ويكفي أن المنتخب الوطني لكرة القدم داخل القاعة الى حقق نتائج إيحابية غادي يتأهل رفقة جوج منتخبات لكأس العالم فليتوانيا. وهادا ميساج قوي وعندو نتائج كبيرة غادي تمهد لأنشطة رياضية أكبر مستقبلا تدار فالعيون.